VOV4.Jarai - Ƀrô djơ̆ tal Jơlan hơdră “Bơngač pran run đĭ Việt” thun 2021, mơguah lơ 13/12 Kơ-iăng Khua git gai wai lăng pơ ala mơnuih ƀôn sang dêh čar ơi Nguyễn Khắc Định hmâo laih mông bưp ƀô̆ mơta 20 čô mơnuih pơ ala, amăng mrô 50 čô mơnuih ngă gru hlăk ai ƀu klă drơi jăn mơbruă, gah 34 bôh tơring čar, ƀôn prong gum hrom jơlan hơdră. Jơlan hơdră “Bơngač pran run đĭ Việt” thun 2021 kiăng lar hyu hơdôm gru ba jơlan hlâo hơdip gơgrong, pran gơgrong amăng mơnuih mơnam. 50 čô mơnuih ngă gru hlăk ai ƀu klă drơi jăn mơbruă thun anai hmâo lu mơnuih ba glăi bôh than prong amăng hơdôm bruă mă bôh thâo adôh suang, bơkơjăp drơi jăn hăng ngă pơtrut pran jua prong kơ hlăk ai tơdăm ngek dra muai; ƀu djơ̆ kơnong kơ gum hrom klă tơlơi pơphun bruă mă, pơphun truh kih ôh mơ̆, ñu dô̆ gum djru klă ƀing gơyut hrŭp amăng tơlơi hơdip pơphun bruă mă, gum hrom klă bruă djru khul mơnuih lĕ gru bơngač rơđah amăng khul mơnuih, biă ñu gum hrom bruă lăi pơhing, djru pơgang, pơgăn klin Covid-19 phrâo rơgao. Kơ-iăng Khua git gai wai lăng pơ ala mơnuih ƀôn sang dêh čar ơi Nguyễn Khắc Định brơi thâo amra gum hrom hơdôm ƀirô mơng Khua pơ ala mơnuih ƀôn sang ngă giong dong hăng pơphun ngă tui ba glăi bôh tơhnal hơdôm hơdră bruă hmâo bơdjơ̆ nao mơnuih ƀu klă drơi jăn./.

Siu H’ Prăk: Pơblang