VOV4.Jarai - Anom bruă Khua mir sir dêh čar Mi phrâo lăi pơthâo, Kơ-iăng khua mir sir dêh čar Mi yă Kamala Harris amra rai čuă Việt Nam hăng Singapore amăng blan 8/2021. Tal rai čuă anai kiăng bơkơtuai hăng khua mua dua boh dêh čar kơ hơdôm tơlơi mơ̆ ƀing gơñu lăp đing nao, amăng anun hơmâo tơlơi rơnuk rơnua, klin Covid-19, ayuh hyiăng pơplih, hăng tơlơi gir run kiăng ngă hơđong glăi jar kmar tui tơlơi phiăn. Tal nao čuă anai amra pơđĭ tui tơlơi ngă hrŏm hăng pok prong ngă hrŏm bơwih ƀong hăng dua boh dêh čar ngă gŏp phun mơng Mi ƀơi kual Ấn Độ Dương - Thái Bình Dương.

Kơ-iăng khua mir sir dêh čar Mi yă Kamala Harris

Tal rai čuă Việt Nam mơng Khua ding jum pơtom hiăp Lloyd Austin jing pơđĭ tui tơlơi rô nao rai mơ-ak, đăo gơnang nao rai kơplah wah mơnuih ƀon sang, ling tơhan dua boh dêh čar, lăi pơthâo hơdôm tơlơi ngă hrŏm amăng bruă tơhan, pơgang lŏn ia hơmâo kĭ kơplah wah Ding jum ling tơhan hăng tơlơi pơkôl mơng khua mua dua boh dêh čar, gum ngă klă tui Tơlơi pơkôl ngă hrŏm abih bang Việt Nam - Mi.

Siu H’Mai: Pơblang