VOV4.Jarai - Kơ-iăng Khua dêh čar ta ơi Trương Hoà Bình hmâo nao pel ĕp hăng mă bruă hăng gong gai hơdôm bôh quận Gò Vấp hăng Bình Thạnh ƀôn prong Hồ Chí Minh kơ bruă pơgang, pơgăn klin ƀơi ƀôn prong. Amăng hơdôm mông mă bruă hăng 2 bôh quận Gò Vấp hăng Bình Thạnh, Kơ-iăng Khua dêh čar ta rơkâo hơdôm bôh quận khom hmâo kơčăo bruă prăp lui djop gơnam mă yua, kiăng pơhlôm 4 mơta bruă hơđăp lom hmâo klin ngă glêh tơnap. Kơtưn wai lăng anih anom, pơtrut kơtang dong bruă lăi pơhing brơi kơ mơnuih ƀôn sang, biă ñu lĕ hăng hơdôm anih anom pơkra gơnam, hơdôm kual sang brơi arăng apah dô̆, mơnuih sĭ mơdrô raih daih anet ngă klă 5 mơta tơlơi pơgang klin. Kơ-iăng Khua dêh čar ta pơtă pơtăn hơdôm anih anom khom ngă klă bruă gum hrom amăng pok pơhai ngă tui, biă ñu lom hmâo khul mơnuih dưi pơkiăo nao kiăng djru pơgang, pơgăn klin. Tui hăng ñu, khă khul mơnuih gum hrom pơgang, pơgăn klin mơng anih pơkon leng kơ nao ƀudah khul ƀơi ƀôn prong lĕ quận leng kơ khom gơgrong hlâo wai lăng kơjăp, pơlir hơbit, pơhlôm ƀu pioh bơdjơ̆ nao, ngă tơnap kơ mơnuih ƀôn sang./.

Siu H’ Prăk: Pô pơblang