VOV4.Jarai - Tlam lơ 6/1, ƀơi Hà Nội, Khul pơlir hơbit hơdôm grup giang mah Việt Nam, Khul giang mah Việt Nam -India gum hrŏm hăng Sang anih jưh pơ ala dêh čar India ƀơi Việt Nam pơphun ngă lơphet pioh hơdor glăi 50 thun hrơi akŏ pơjing tơlơi rô nao rai pơtom hiăp Việt Nam - India. Nao jơnum hrŏm hơmâo Kơ-iăng Khua mir sir yă Võ Thị Ánh Xuân. Khua ding jum pổr pơhing Nguyễn Mạnh Hùng, Khua Khul giang mah Việt Nam-India pơsit tong Khul giang mah Việt Nam-India hăng Khul pơlir hơbit hơdôm grup giang mah Việt Nam - India hơmâo ngă hrŏm kjăp hăng dêh čar India hăng hơdôm anom bruă bơdjơ̆ nao dua bơnah, Kơtưn dong amăng bruă pơbưp nao rai kơplah mơnuih ƀon sang, djă pioh hăng pơsur pran khăp tơdruă. Mơng anun pơgôp pơtrut bruă ngă hrŏm djop mơta Việt Nam -India jai pơđĭ kyar phrâo, djơ̆ hăng tơlơi dưi hrŏm kơplah wah mơnuih ƀon sang dua bơnah. Amăng mông ngă lơphet Kơ-iăng Khua mir sir yă Võ Thị Ánh Xuân rơkâo, hơdôm anom bruă, khul grup, anom bơwih ƀong sĭ mơdrô hăng mơnuih ƀon sang dua bơnah hơmâo gum hrŏm kjăp dong, djă pio hơdrưh ang, tơlơi dưi mơng dua bơnah, tŭ mă hơdôm tơlơi gal amăng ngă hrŏm. Ngă tui klă hơdôm Jơlan hơdră bruă mă rơwang thun 2021-2023 pok pơhai tơlơi rô nao rai ngă hrŏm amăng djop mơta hăng tơlơi anăp nao hrăm yua kơ tơlơi rơnuk rơnua, pơdrong asah hơmâo mơnuih ƀon sang tŭ yap amăng blan 12/2020.

Siu Đoan: Pơblang