VOV4.Jarai-Mơguah lơ 16/9, ƀơi Hà Nội, Kơ-iăng Khua mir sir yă Võ Thị Ánh Xuân hơmâo mông mă bruă hăng khua mua, ơi ia jrao Sang ia jrao Viện Huyết học-brơi drah dêh čar hăng ƀơk gơnam kơ čơđai ruă ung thư dŏ pơjrao ƀơi anai ƀrô čơkă blan bơrơmi ria. Kơ-iăng khua mir sir yă Võ Thị Ánh Xuân mơ-it hiăp juh alum pơtrut pran jua hăng ƀơk gơnam kơ čơđai ruă ung thư. Sa anung gơnam hơmâo ƀañ Trung thu, ia tơsâo, gơnam djă ngui truă ngă rup hăng prăk mơta.

Kơ-iăng Khua mir sir nao čuă, tơña bla čơđai duăm ruă

Hrơi anun mơ̆n, mă bruă hăng ƀing khua mua, ơi ia jrao sang ia jrao Viện Huyết học-brơi drah dêh čar, yă Võ Thị Ánh Xuân bơni kơ tơlơi gir run mơ̆ng sang ia jrao anai, djru hrom pơhlôm, pơgang klin rah, laih anun pơjrao tơlơi ruă pơkŏn kơ mơnuih ƀôn sang, laih anun djru 125 čô mơnuih mă bruă, nai ia jrao nao pơ ƀôn prong Hồ Chí Minh dơ̆ng.

Hrom hăng bruă pơgang djop brơi drah pioh pơjrao duăm ruă ƀơi sang ia jrao pô hăng 172 boh sang ia jrao pơ kual gah kơdư dêh čar, sang ia jrao Viện Huyết học brơi drah dêh čar dŏ djru hmao kru 12 rơbâo anung drah kơ hơdôm sang ia jrao pơ kual gah dơnung amăng hrơi blan pơjrao duăm ruă djơ̆ klin Covid 19 hơđuh rai.

Nay Jek: Pơblang