VOV4.Jarai - Dua čô čơđai sang hră ƀơi plơi prong Kon Tum, tơring čar Kon Tum hơmâo ƀuh ƀă klin SARS-CoV-2 lĕ čơđai hrăm anih 3 hăng anih 5 Sang hră gưl sa Hoàng Văn Thụ, phường Quyết Thắng. Tơdơi kơ hmư̆ hing, Anom bruă ia jrao plơi prong Kon Tum nao pơčrang kman brơi abih bang ƀing čơđai hăng nai pơtô glăk dŏ ƀơi sang hră. Ƀing nai pơtô ăt iâu nao amĭ ama sang anŏ ƀing čơđai hơmâo ană bă hrŏm tom 2 čô čơđai djơ̆ klin tŭ glăi ană bă pơ sang, dơ dăng pioh pơčlah pơ sang, hăng pơtô ba amĭ ama ƀing čơđai nao pơ sang ia jrao amăng plơi lăi pơthâo hăng pơčrang kman brơi ana bă ƀing gơñu.

Amĭ ama ƀing čơđai nao tŭ glăi ană ñu mơng Sang hră Hoàng Văn Thụ

Ƀơi anăp bruă hơmâo 2 čô F0 lĕ čơđai sang hră, hrŏm hăng tơlơi git gai hyu ĕp kru, hơduah tơña ƀing dŏ jê̆ giăm hŭi kman ƀă hyu prong, Jơnum min mơnuih ƀon sang plơi prong Kon Tum ăt pơsit brơi čơđai sang hră Hoàng Văn Thụ pơdơi hrăm pơ sang hră, hơdai hrăb mơng ataih, hrăm pơ sang dong pioh pơgang klin.

Siu H’Mai: Pơblang