VOV4.Jarai-Mơguah lơ 6/9, Jơnum min mơnuih ƀôn sang tơring čar Kon Tum, pơphun brơi khul grup mơnuih ngă bruă pơjrao mơ̆ng tơring čar nao gum hrom pơgang klin Covid 19 ƀơi tơring čar Bình Dương. Tui hăng akŏ bruă, grup hơmâo 30 čô ơi ia jrao, nai ia jrao, ƀing mă ƀuai tơring čar Kon Tum nao djru mă bruă ƀơi tơring čar Bình Dương amăng 30 hrơi. Hlâo kơ nao mă bruă, ƀing nai ia jrao, ơi ia jrao hơmâo hrăm kjăp glăi bruă mă 6 hrơi yua kơ Gơnong bruă ia jrao tơring čar pơtô; kah hăng pơjrao, mă ia khak, ba pơčrang kman sars-cov-2 hăng hơdră pơčrang Realtime PT-PCR.

Khua tơring čar Kon Tum ƀơk gơnam, čơphil rup djă pioh hăng grup či nao mă bruă

Đĭ pơhiăp pơtrut pran jua ƀing ơi ia jrao mơ̆ng tơring čar hlâo kơ nao mă bruă, ơi Lê Ngọc Tuấn, Khua Jơnum min mơnuih ƀôn sang tơring čar Kon Tum čang rơmang: abih bang ƀing ding kơna amăng grup amra ngă bruă abih pran jua, thâo gum pơgôp nao rai, glăm ba bruă, pơsir tơlơi tơnap amăng bruă mă, pơgang tơlơi suaih pral hăng pơhlôm rơnuk rơnua kơ drơi jăn pô.

Mông pơčlah mă tơngan sang anŏ laih anun ƀing gŏp ngă bruă hrom mơ̆ng 30 čô mơnuih amăng grup nao mă bruă

Kiăng pơtrut pơsur pran mă bruă ƀơi tơring čar Bình Dương, tơring čar Kon Tum, gơnong bruă ia jrao, anom bruă mơnuih tơpuôl, kông ty pơčruh ngăn sâm Ngọc Linh Kon Tum brơi kơ grup hăng djop pô amăng grup rơnoh prăk 285 klăk.

Nay Jek: Pơblang