VOV4.Jarai-Ƀơi tơring čar Kon Tum anom bruă ia jrao hlăk hăt biă mă kiăo tui kơ hrơi mông kiăng abih blan 11 anai khom tlâ̆o djop ia jrao vaccine pơgang covid 19 kơ mơnuih mơ̆ng 18 thun. Ia Chim lĕ să ataih kual treng gah plơi prong Kon Tum, đơ đam să hơmâo 7000 čô mơnuih mơ̆ng 18 thun pơngŏ lêng kơ Jrai hăng Bahnar soh.

Sang ia jrao să Ia Chim brơi thâo, kiăng dưi tlâ̆o djop kơ mơnuih 18 thun amăng blan 11 anai, hrom hăng anun khom ba djop gơnam yua mă bruă tlâ̆o pơgang kơ ană plơi pla, sang ia jrao să ngă hrom khua mua să pơtô pơblang, jak iâu ană plơi ngă hrom tong ten pioh tlâ̆o pơgang vaccine djơ̆ hơdră.

Kiăng pơtrut tañ hnong tlâ̆o pơgang vaccine covid 19, anom bruă ia jrao tơring čar Kon Tum gleng nao bruă pơtum mơnuih mă bruă ƀơi 111 bit anih pơphun tlâ̆o pơgang amăng đơ đam tơring čar. Hrom hăng anun, pơtrut bruă mă mơ̆ng 2.800 grup ngă bruă pơgang klin amăng kual plơi pla, hyu pơtô lăi, pơčrâo brơi mơnuih ƀôn sang nao tlâ̆o vaccine pơgang klin djơ̆ hăng djop.

Nay Jek: Pơblang