VOV4.Jarai-Lơ̆m ƀôn prong Hồ Chí Minh kơƀah añăm pơtam hơdôm hrơi pơčlah mơnuih mơnam bong glăi hăng klin Covid 19, lu khul mơnuih ngă hrom, grup, tơpuôl pơyơr pran jua djru mơnuih ƀôn sang hăng hơdôm rơtuh čô ding kơna ƀơi plơi prong Kon Tum hơmâo hyu blơi pơƀut glăi añăm pơtam pioh pơgiăng ba nao pơ ƀôn prong Hồ Chí Minh djru mơnuih ƀôn sang pơ anai.

Mơưng mơguah sing bring, amai Nguyễn Thị Thảo Nguyên, Khua khul ngă hrom anăn drah hlor amăng kual plơi prong Kon Tum hăng kual Dap Kơdư hơmâo ƀuh ƀô̆ mơta pơ hơdôm blah đang añăm pơtam ƀơi phường Nguyễn Trãi, plơi prong Kon Tum. Amai Nguyên brơi thâo, kơnang kơ facebook, thâo rơđah bruă mă yôm mơ̆ng khul mơnuih ngă hrom, pô đang añăm kiăng bưp khul ngă hrom, pioh djru 2 bôk đang añăm hơbơi pla rơgoh. Bruă dŏ glăi lĕ ding kơna amăng khul khom nao buč añăm hơbơi, ba pơƀut sa anih laih anun răk pioh añăm kiăng dŏ asăt na nao:

“Añăm truh hrơi buč, añăm asăt rơgoh hiam biă mă. Tơdah añăm pơgiăng nao brŭ hiă hĭ, ƀing tŭ mă ăt ƀu thâo yua lơi. Gơmơi hơmâo pơtruh hăng khul mơnuih ngă hrom ƀơi hơdôm tơring glông pioh ngă anih tŭ mă añăm djru mơ̆ng mơnuih ƀôn sang. Tơdơi kơ anun, gơmơi amra buč pơƀut glăi sa anih ƀơi plơi prong Kon Tum laih anun kah pơgiăng nao hăng rơdêh prong”.

Ding kơna amăng khul djru mơnuih ƀôn sang Kon Tum hăng

 Kual Dap Kơdư dŏ buč añăm pơtam pioh ba nao djru

Ngă hrom pơƀut añăm pioh djru kơ mơnuih ƀôn sang pơ ƀôn prong Hồ Chí Minh, khul ngă hrom, grup, tơpuôl djru pran jua yua kơ ană plơi pla tơring čar Kon Tum hơmâo pơƀut hĭ năng ai 10 tơn añăm asăt, mơ-it nao kơ mơnuih ƀôn sang ƀôn prong Hồ Chí Minh. Hrom hăng anun, hơdôm mơta añăm pơtam kah hăng añăm hơbơi hla rui, añăm ƀăr, añăm tŭ…hrom hrom gêt plôi, rơtă rơbai dưi djă pioh sui hrơi hloh.

Sa tơlơi lăp gleng nao, lăp bơni biă mă lu bruă mă djru añăm pơtam kơ mơnuih ƀôn sang ƀôn prong Hồ Chí Minh, dưi hơmâo lu mơnuih ƀôn sang tơring čar Kon Tum ngă hrom. Amai Bùi Thị Tuyết Yên, sang pơ grup mrô 2, phường Nguyễn Trãi, plơi prong Kon Tum, hơmâo đang añăm tŭ sĭ mơdrô rĭm hrơi, ñu ăt kleč mă pioh djru đang añăm sang anŏ brơi kơ mơnuih ƀôn sang tơnap tap, ñu lăi:

“Sang anŏ gơmơi pla añăm tŭ, pĕ hơdôm pă lĕ brơi djru kơ mơnuih ƀôn sang hơdôm anun. Hơmâo rơdêh arăng pơgiăng nao, ta djru tui mơtam kơ mơnuih ƀôn sang pơ adih. Sa črek lơ̆m rơpa dưm dưm hăng sa anung lơm trơi, arăng juăt pia"”

Hrom hăng pơphun hyu tŭ mă añăm djru mơ̆ng lu anih amăng plơi prong Kon Tum hăng hơdôm tơring glông kah hăng: Đak Ha, Đak Tô, Kon Plong….ƀing ding kơna khul ngă hrom ƀơi Kon Tum hăng Kual Dap Kơdư, khul Kâo khăp Kon Tum, Team Kon Tum…amra kah pơpha, răk pioh añăm pơtam pioh pơgiăng nao pơ ƀôn prong Hồ Chí Minh.

Ayong Trần Văn Cao Sang, Khua khul Kâo khăp Kon Tum brơi thâo, hơdră rơdêh pơgiăng nao añăm pơtam lơ̆m hrơi blan klin Covid 19 hlăk kơtang ăt khom pơmin tong ten, kiăng añăm pơtam djru dưi truh pơ mơnuih ƀôn sang ƀôn prong tañ hloh hăng rơnuk rơnua:

“Blung a lĕ apah rơdêh pơgiăng gơnam. Pah rơdêh lĕ khom ĕp kman hlâo kơ pô mơgăt rơdêh kiăng huăi hơmâo klin Covid 19. Ta pơtruh nao rai hăng khul grup ngă bruă hrom ƀơi Gia Lai gơñu hơmâo rơdêh djru soh sel. Ta pơgiăng nao añăm truh pơ anih gơñu anun. Bơ bruă ba djru lĕ, gơmơi pơtruh hăng anom bruă hlăk ai tơdăm dra mut phung ƀôn prong Hồ Chí Minh hăng hơdôm khul grup ngă bruă pơ anun. Gơñu amra tŭ mă añăm pơtam ta laih anun pơgiăng nao pơ anih dŏ pơčlah mơnuih mơnam”.

Khoa Điềm –pô čih: Nay Jek pơblang