VOV4.Jarai - Mơguah lơ 28/12, ƀơi Anom bruă git gai tơhan tơring čar Kon Tum, Anom bruă git gai hyu ĕp, duñ pơƀut, ba glăi tơlang tơleh hăng pơsit anăn ling tơhan djai pơsăn drơi tơring čar Kon Tum pơphun brơi grup tơhan K53 hyu ĕp tơlang tơhan, duñ pơƀut tơlang tơhan djai pơsăn drơi kơ lŏn ia amăng bơyan phang 2021-2022 ƀơi 3 boh tơring čar gah Dơnung dêh čar Lao. Grup tơhan K53 tơring čar Kon Tum nao bruă mă, hyu ĕp, hyu duñ tơlang tơhan djai pơsăn drơi kơ lŏn ia bơyan phang 2021-2022 hơmâo 30 čô khua, ling tơhan mơng Anom bruă git gai tơhan tơring čar Kon Tum.

Khua mua git gai tơring Kon Tum hăng Khua Anom bruă git gai tơhan tơring čar nao čuă, tơña bla, juh alum Grup tơhan K53 hlâo či nao ngă bruă.

Anih hyu ĕp, pơƀut tơlang tơhan hơmâo pơsit ƀơi 3 boh tơring čar Attapư, Sêkông hăng Chămpasăc dêh čar Lao. Hrơi blan mơ̆ Grup K53 tơring čar Kon Tum ngă bruă hyu ĕp, pơƀut tơlang tơhan djai pơsăn drơi ƀơi 3 boh tơring čar him lăng mơng anai truh abih blan 5 thun 2022.

Siu H’Mai: Pơblang