VOV4.Jarai - Ƀơi tơring čar Kon Tum mơng lơ 5/10 truh lơ 6/10, anom bruă ia jrao hơmâo ƀuh lu mơnuih ƀă kman hăng ƀă glăi kman SARS-CoV-2. Anai lĕ ƀing glăi mơng tơring čar Bình Dương. Rơđah biă ñu amăng lơ 6/10, Sang ia jrao tơring čar Kon Tum hơmâo ƀuh 4 čô mơnuih ƀă kman SARS-CoV-2. Amăng 4 čô F0 hơmâo 2 čô dŏ pơ să Pô Kô, tơring glông Đăk Tô, 1 čô ƀơi să Đăk Kan, tơring glông Ngọc Hồi hăng sa čô dŏ glăi sang ñu pơ să Đăk Ngọc, tơring glông Đăk Hà.

Mơnuih ƀon sang glăi mơng hơdôm boh tơring čar gah Dơnung nao pơ anih dŏ gak pơgang klin mrô 1 Sao Mai, plơi prong Kon Tum.

Hơdôm čô ƀă klin lêng hơmâo ba nao hlao pơ anih dŏ pơčlah tơdơi kơ glăi mơng Bình Dương nao pơ anih dŏ gak pơgang klin mrô 1 Sao Mai, plơi prong Kon Tum amăng lơ 4/10. Amăng lơ 5/10, anom bruă ia jrao tơring čar Kon Tum hơmâo ƀuh 12 čô ƀă glăi kman SARS-CoV-2. Ƀing anai lêng hơmâo pơjrao klin Covid-19 mơng Bình Dương laih, hlong či glăi pơ plơi pla mă pô, laih anun hơmâo pơčrang lăng ƀơi Anih pơgăn mrô 1 Sao Mai, plơi prong Kon Tum. Tơring čar Kon Tum jing tơring čar hơjăn ñu yơh ƀơi Dap Kơdư aka ƀu hơmâo mơnuih ƀă klin Covid-19 amăng plơi pla.

Siu H’Mai: Pơblang