VOV4.Jarai-Mah tơring čar aka ƀu hơmâo mơnuih ƀă klin ôh, samơ̆ ƀơi anăp kơ tơlơi hŭi rơhyưt klin Covid 19 ƀă hyu kơtang, tom brơi, lơ 17/5, Khua Jơnum min mơnuih ƀôn sang tơring čar Kon Tum hơmâo pơsit, pơđĭ tui anŏ hŭi rơhyưt pioh pơhlôm, pơgang klin Covid 19 kơtang hloh.

Mơnuih ƀôn sang să Đak Dục, tơring glông Ngọc Hồi, Kon Tum ngă tui khut khăt truă bơnal gôm ƀô̆ nao ĕp lăng tơlơi pơhing pơ anih plĕ hră ruah khua

Tui hăng anun, Jơnum min mơnuih ƀôn sang tơring čar Kon Tum pơtrun brơi pơđĭ tui anŏ hŭi rơhyưt hăng kơtưn pơhlôm pơgang klin Covid 19 amăng tơring čar kơtang hloh dơ̆ng mơ̆ng krah mlam nao kơ mơguah lơ 18/5. Hrom hăng pơtrun hiăp djop gơnong bruă, anom bruă pơphun ngă tui khop hơdră pơhlôm pơgang klin, Jơnum min mơnuih ƀôn sang tơring čar Kon Tum brơi pơgô̆ mơnuih ƀôn sang khom truă bơnal gôm ƀô̆ sit tơbiă đuăi mơ̆ng sang anŏ, nao pơ anih mơnuih lu hăng ngă tui djơ̆ 5 mơta tơlơi pơtă mơ̆ng Ding jum ia jrao.

Jơnum min mơnuih ƀôn sang tơring čar Kon Tum ăt pơtrun hiăp kơ 10 boh tơring glông, plơi prong pơtum abih bang anom bruă kơđi čar, mơnuih mă bruă kơnuk kơna sem lăng tong ten tơlơi pơhing klin amăng tơring čar, truh pơ djop sang anŏ mơnuih ƀôn sang, kiăng thâo tañ hlơi pô jĕ giăm, glăi mơ̆ng anih hơmâo klin brơi nao dŏ pơčlah hơjăn mơtam, kiăng pok pơhai ngă tui tong ten hơdră pơhlôm pơgang klin, pơgăn klin hmao kru.

Nay Jek: Pơblang