VOV4.Jarai - Amăng hơdôm hrơi giăm anai, tơring čar Kon Tum hơmâo na nao mơnuih ƀă kman F0 amăng anih pơčlah hăng gah rơngiao. Ƀơi anăp tơlơi anai, gong gai hăng mơnuih apăn bruă pơgang klin kiăng wai lăng kơtang hloh đah mơng pơgăn hĭ klin bơƀă hyu kơ mơnuih mơnam. Ƀơi mông jơnum pơčrông sai bruă pôr pơhing blan 10, hơmâo Anom pơtô bruă Ping gah tơring čar Kon Tum pơphun amăng lơ 28/10, ơi Nguyễn Đình Câù, Kơ-iăng khua Anom bruă Jơnum min mơnuih ƀon sang tơring čar Kon Tum lăi pơthâo, tơring čar Kon Tum ăt dŏ djă pioh na nao anih gak pơgang klin ƀu djơ̆ anih gak wai lăng rơdêh nao rai ôh, yua hnun tơring čar amra ƀu ruh hĭ ôh tui hăng tơlơi kiăng mơng Ding jum wai lăng jơlan glông pơdŭ pơgiăng. Dua hrơi rơgao, ƀơi anih dŏ gak pơgang klin mrô 1 Sao Mai, plơi prong Kon Tum hăng anih dŏ gak mrô 2 ƀơi čư̆ pơđuai Lò Xo, tơring glông Đăk Glei ƀơi jơlan Hồ Chí Minh hơmâo ƀuh 3 čô mơnuih ƀă kman SARS- CoV-2, amăng anun hơmâo 1 čô glăi mơng Hà Nội hăng 2 čô mơng tơring čar Dak Lăk. Ƀơi anăp bruă mơnuih ƀon sang abih hrơi pơčlah pơƀut glăi pơčlah mă pô pơ sang dong kah mơng ƀuh kman, jing ngă klin ƀă hyu amăng plơi pla, sa, dua boh tơring glông, plơi prong ƀơi Kon Tum kiăng ƀing dŏ pơčlah rơkâo mă pô dŏ glăi pơ anih pơčlah pơƀut 7 hrơi dong.

Anih krăp lăng tơlơi suaih pral kơ mơnuih ƀon sang tơdơi abih hrơi pơčlah pơƀut ƀơi phường Lê Lợi, plơi prong Kon Tum

Truh mông anai, tơring čar Kon Tum hơmâo 328 čô mơnuih ƀă klin Covid-19, amăng anun hơmâo 222 čô mơnuih ruă, 106 čô mơnuih ƀă glăi dong. Amăng mrô mơnuih ƀă klin hơmâo 206 čô arăng ƀuh ƀă klin ƀơi anih pơčlah, 15 čô ƀă klin amăng plơi pla, hăng 1 čô ƀuh amăng anih pơčlah pơ sang ia jrao.

Siu H’Mai: Pơblang