VOV4.Jarai - Tơring čar Kon Tum ăt gơñăm nao kơ bruă pơđĭ tui bruă mă mơng Anom ngă ƀong hrŏm, grup ngă ƀong hrŏm; pơđĭ tui tơlơi tŭ yua bruă gum pơgôp mơng kual bơwih ƀong hrŏm amăng bruă pơđĭ kyar tơlơi bơwih ƀong, lŏm lui tơlơi rin rơpa hơđong kơjăp; pơđĭ tui tơlơi gơgrong bruă yôm mơng anom bruă bơwih ƀong huă ngă hrŏm. Anai lĕ tơlơi pơsit mơng Khua mua apăn bruă git gai Ping gah tơring čar Kon Tum ƀơi mông Jơnum klah čun 20 thun ngă tui Tơlơi pơtrun 13, Jơnum Ping gah dêh čar tal 9 kơ bruă pơplih phrâo, pơđĭ kyar, pơđĭ tui anŏ tŭ yua mơng bruă bơwih ƀong hrŏm hăng 10 thun pok pơhai ngă tui Tơlơi phiăn Hợp tác xã thun 2012 pơphun amăng lơ 23/11, ƀơi plơi prong Kon Tum.

Kon Tum pơtrut đĭ tơlơi gơgrong mơng Grup ngă ƀong hrŏm amăng bruă pla sâm Ngọc Linh gah yŭ kyâo tơ-ui.

Hơbô̆ bruă pơkra kơphê hơdjă mơng sa anom ngă ƀong hrŏm ƀơi tơring glông Đăk Hà, tơring čar Kon Tum.

Tơdơi kơ 20 thun ngă tui tơlơi pơtrun, truh ră anai tơring Kon Tum hơmâo 194 anom ngă ƀong hrŏm hăng rơbêh 9.700 čô ding kơna hăng 210 grup ngă ƀong hrŏm hăng giăm 2.200 čô mơnuih glăk ngă bruă. Prăk pơhrui mơng sa čô mơnuih ngă bruă ƀơi anai năng ai 41 klăk prăk/thun. Khua mua apăn bruă git gai Ping gah tơring čar Kon Tum pơsit, ăt gơñăm kiăng pơđĭ tui klă hloh bruă mă mơng Anom ngă ƀong hrŏm, grup bơwih ƀong hrŏm; pơđĭ tui anŏ klă mơng tơlơi bơwih ƀong hrŏm djru pơđĭ kyar tơlơi bơwih ƀong, lŏm lui tơlơi rơmŏn rơpa; pơđĭ tui tơlơi gơgrong bruă, tơlơi yôm mơng tơlơi bơwih ƀong hrŏm amăng tơlơi bơwih ƀong abih bang.  

Siu H’Mai: Pơblang