VOV4.Jarai - Tơring čar Kon Tum hơmâo 6 boh să tơnap tap hloh, amăng anun hơmâo 3 boh să ƀơi guai dêh čar hăng 6 puih kơđông tơhan pơgang guai giăm hăng dêh čar Lao, ƀơi 2 boh tơring glông Đăk Glei, Ngọc Hồi hơmâo Khul wai lăng bruă ruah khua brơi pơphun plĕ hră tañ hlâo kơ ha hrơi, anun lĕ amăng hrơi anai lơ 22/5. Amăng hrơi plĕ hră tañ amăng lơ 22/5, 6 boh să tơnap hloh hơmâo 36 anih plĕ hră hăng rơbêh 10.000 čô mơnuih nao plĕ.

Anih plĕ hră mrô 2 plơi Đăk Nớ, să Đăk Nhoong, tơring glông Đăk Glei amăng hrơi plĕ hră tañ.

Prăp lui tĕp hră črâo brơi ƀing nao plĕ hră pơgang klin Covid-19.

Ƀơi hơdôm anih plĕ hră tañ hloh kơ hrơi pơkă ƀơi tơring čar Kon Tum, hrŏm hăng pơhlôm anih anom, gơnam bơwih brơi bruă plĕ hră, gong gai hăng anom bruă ƀơi anai ăt pơgang klin Covid-19 klă mơn. Hlâo kơ hrơi plĕ hră, khua mua, mơnuih mă bruă ia jrao hơmâo nao pruih jrao pơdjai kman, prăp lui anih pơkă hyuh drơi jăn, kơƀang pioh get ia pơdjai kman, khăn gôm ƀô̆ hăng prăp lui anih dŏ pơčlah lơ̆m ƀuh hlơi thơ duam, pơtuk, ƀu thâo suă pran amăng mông plĕ hră.

Siu H’Mai: Pơblang