VOV4.Jarai-Amăng hrơi blan klin kheng covid 19 ngă, bruă sĭ mơdrô hang tač rơngiao mơ̆ng tơring čar Kon Tum 9 blan rơgao ăt djă hnong pơđĭ kyar kơtang rơgao akŏ bruă jao. Tum teč hloh 9 blan rơgao, rơnoh prăk sĭ mơdrô hăng tač rơngiao mơ̆ng Kon Tum dưi pơhrui glăi truh 174 klăk dolar, lu hloh akŏ bruă jao 41% pơkă hăng thun hlâo.

Mơnuih ƀôn sang Kon Tum mă kơtăk kơsu

Amăng anun, kơsu lĕ gơnam sĭ mơdrô phun hơmâo mơ̆ng 80-85%. Tui hăng Jơnum min mơnuih ƀôn sang tơring čar Kon Tum, mah bưp lu tơlơi tơnap tap yua klin kheng covid 19 ngă, samơ̆ truh abih blan 9 sĭ mơdrô hăng tač rơngiao mơ̆ng tơring čar giăm ngă djop akŏ bruă amăng sa thun. Tơlơi gêh găl lĕ nua kơtăk kơsu hơdôm blan akŏ thun đĭ tui mơ̆ng 15-17% pơkă hăng thun hlâo; dêh čar Khač yơh anih sĭ mơdrô lu hloh hlăk rŭ glăi tơdơi kơ klin covid 19 abih anun yơh sĭ lu. 

Amăng hơdôm blan rơnuč thun him lăng kơsu sĭ mơdrô amra hrŏ tui, anom bruă pơkra ôtô jar kmar rŭ glăi bơwih ƀong huă hăng tơlơi bơwih ƀŏng huă dêh čar Khač pơđĭ kyar anun ngă gêh găl kơ anom bruă sĭ mơdrô tơring čar Kon Tum amăng bruă sĭ mơdrô djuai gơnam anai.

Nay Jek: Pơblang