Amăng 9 blan rơgao, Kon Tum lĕ tơring čar ngă pơhưč arăng tuh pơ plai tơdu hloh pơhmu hăng hơdôm boh tơring čar pơkŏn amăng kual Dap Kơdư. Ƀơi anăp tơlơi anai, ƀơi mông Jơnum lok 5 Khua mua apăn bruă git gai Ping gah tơring čar tal 16 pok prong phrâo pơphun amăng rơwang hrơi tơjuh rơgao, Ping gah tơring čar Kon Tum pioh mông ĕp tơlơi ngă gun, ĕp hơdră pơsir kiăng ngă pơhưč anom bơwih ƀong mơng pơkŏn tuh pơ plai.

9 blan rơgao, tơring čar Kon Tum ngă pơhưč hơmâo 28 kơčăo bruă tuh pơ plai hăng mrô prăk rơbêh 8.000 klai prăk, samơ̆ abih bang lêng lăi amăng hră pơ-ar đôč aka ƀu ngă ôh. Rơđah biă ñu, ră anai kơnong hơmâo 2 kơčăo bruă đôč hơmâo ngă giong, pơphun bơwih ƀong sĭ mơdrô hăng mrô prăk rơbêh 10 klai prăk, 5 kơčăo bruă glăk pơphun ngă hăng mrô prăk 24 klai prăk hăng sa, dua kơčăo bruă pơkŏn dong ăt glăk dŏ ngă hră pơ-ar. Tui hăng ơi Ngô Việt Thành, Khua gơnong bruă Kế hoạch hăng Đầu tư tơring čar Kon Tum (wai lăng akŏ bruă hăng tuh pơ plai) sa tơlơi ngă gun amăng bruă ngă pơhưč tuh pơ plai mơng tơring čar lĕ yua bơdjơ̆ nao lŏn tơnah.

“Giăm 90% kơčăo bruă bơdjơ̆ nao lŏn tơnah lĕ lêng hơmâo anŏ phara mơng bruă čuk pơkra 3 mơta glai rưng hăng lŏn tơnah hơmâo sit ră anai, yua hnun jing bơrơkua nao rai amăng bruă tŭ ư brơi tuh pơ plai. Rơngiao kơ anun, mrô kơčăo bruă rơkâo kiăng pioh pơđĭ kyar bơwih ƀong huă mơnuih mơnam ƀudah čuk pơkra lŏn tơnah ƀu djơ̆ hăng tơlơi rơkâo mơng pô brơi prăk pơkra. Giong anun dong, hơmâo Jơnum min mơnuih ƀon sang tơring glông, plơi prong đa lĕ lơ̆m pơƀuh mrô lŏn ăt ƀu lăng ten ôh, lơ̆m pô tuh pơ plai ngă hră pơ-ar kah mơng ƀuh lu tơlơi aka ƀu djơ̆, djơ̆ hrŏm hăng hơdôm kơčăo bruă hơmâo pơkŏn hơmâo tơlơi pơtrun kiăng ngă laih, laih anun bơrơkua nao hăng hơdôm kơčăo bruă arăng hơmâo hră brơi ngă laih ƀudah ƀu djơ̆ hăng bruă čuk pơkra, ngă bruă hrŏm”.

Hnoh ia hlor Đăk Tô lu thun laih arăng lui, dŏ tơguăn arăng rai pơkra ming.

Hrŏm hăng tơlơi hơmâo lăi nao, hơdôm tơlơi ngă gun arăng tuh pơ plai pơ tơring čar Kon Tum dong lĕ gơnong bruă, anom apăn bruă wai lăng tơdu, ƀu klă. Rơđah biă ñu, ƀu djơ̆ hrŏm amăng bruă pơgôp hiăp pơsit bruă man pơkra, jing ngă bơbeč kơ anŏ klă, hrơi blan mơng hơdôm kơčăo bruă tuh pơ plai; hơdôm boh tơring glông aka ƀu pơtrut đĭ ôh tơlơi rơgơi wai lăng, pơtŏng glăi bruă tuh pơ plai đah mơng tañ pơsir brơi tơlơi tơnap kơ ƀing brơi prăk ngă bruă; wai lăng bruă ngă aka ƀu kơjăp, aka ƀu djơ̆ hrŏm lơi. Lăi nao tơlơi aka ƀu dưi ngă amăng tơring čar amăng bruă ngă pơhưč tuh pơ plai, Ding kơ Ping gah, Khua git gai Ping gah tơring čar, Khua Jơnum min pơ ala mơnuih ƀon sang tơring čar ơi Dương Văn Trang lăi nao lu kơ tơlơi gơgrong bruă mơng ƀing khua, kiăng ƀing gơñu khŏm pơplih mơtăm:       

“Lăi nao abih bang lĕ hơmâo sa, dua čô khua ngă bruă aka ƀu klă, aka ƀu gơgrong bruă, ƀu pơmin kơ tơlơi klă mơng tơring čar, mơng mơnuih ƀon sang ôh. Amăng tơlơi pơkă mrô dưi bơkơtưn hơmâo tơlơi pơkă lĕ tơlơi ngă bruă hơdeč hmar, hur har pran jua mơng ƀing khua. Tơring čar ăt jing pô git gai, samơ̆ gơnong bruă ăt git gai mơn. Bơ ƀing ta, arăng rai ta bưp, ƀu rai ta lui, ƀu kiăng ôh. Anom bơwih ƀong gơñu lăi tơdah ƀu kiăng anun lui, rin lĕ tơlơi bơwih ƀong ƀu thâo đĭ kyar ôh”.

Pla hăng pơkra phun jrao hơmâo tơring čar Kon Tum jak iâu arăng tuh pơ plai.

Hrŏm hăng pơsit tơlơi pơgăn pơđĭ kyar, gir akŏ pơjing anih tuh pơ plai rơđah rơđông, tơpă sit, gêh gal hăng kơtưn kơ bruă đah mơng pơhưč arăng tuh pơ plai prăk, sa tơlơi dong hơmâo tơring čar Kon Tum gir khŏm ngă, anun lĕ lăng glăi abih bang, khŏm lui hĭ mơtăm anom bruă tuh pơ plai ngă bruă tơdu, ƀu klă, tuh pơ plai kiăng kơ hơmâo anăn đôč, biă ñu lĕ pioh či sĭ glăi kơ pô pơkŏn dong đah mơng ƀong lơi./.

Khoa Điềm:Čih - Siu H’Mai: Pơblang