VOV4.Jarai-Amăng mrô giăm 357 rơbâo čô mơnuih djơ̆ anăn plĕ hră amăng tơring čar Kon Tum lơ 23/5, ngă tui tơlơi dưi sa čô mơnuih dêh čar, tơlơi dưi ngă khua pô kơnang kơ hla hră plĕ ruah khua pơ ala mơnuih ƀôn sang dêh čar tal XV hăng ruah ƀing pơ ala mơnuih ƀôn sang djop gưl rơwang bruă thun 2021-2026, hơmâo hơdôm rơbâo čô mơnuih plĕ hră lĕ phrâo mut anăn jing mơnuih dêh čar Việt Nam.

Hơdôm mơnuih plĕ hră anai, hlâo adih gơñu jing ƀing hyu dŏ plơi ƀơi guai dêh čar laih anun pơdŏ rơkơi bơnai amăng plơi pla treng guai dêh čar Việt Nam-Lao dưi mut ngă mơnuih dêh čar Việt Nam tui hăng tơlơi bơ tŭ ư nao rai kơplah wah kơnuk kơna dua bơnah.

Jai hrơi giăm hrơi plĕ hră ruah khua pơ ala mơnuih ƀôn sang dêh čar tal XV hăng ƀing pơ ala mơnuih ƀôn sang djop gưl, rơwang bruă thun 2021-2026, rơkơi bơnai bơn A Vơi hăng amai Y Quên, djuai ania Jeh Triêng dŏ pơ plơi Đak Si, să Đak Yuk, tơring glông Ngọc Hồi jai mơak hloh. Hrom hăng bruă kih rơmet pưk sang brơi rơgoh, dua rơkơi bơnai ñu ăt mă hla kơ dêh čar mriah hur, rup pơtŭ kơñĭ tong krah, ba akă ƀơi amăng jang kơdrưh biă mă, anăp sang gơñu.

Sang A Vơi hăng Y Quên akă hla kơ dêh čar mơak Hrơi ruah khua

Amai Y Quên brơi thâo, dua rơkơi bơnai ñu lêng kơ 27 thun soh, dua gơñu hlâo adih amĭ ama nao dŏ pơ dêh čar Lao, glăi mơ̆ng dêh čar Lao nao dŏ pơ plơi Đak Si mơ̆ng anet. Thun 2012, hơmâo tơlơi pơtô ba mơ̆ng gong gai kơnuk kơna plơi pla, dua gơñu ngă hră pơmut anăn jing mơnuih dêh čar Việt Nam laih anun kah ngă hră pơdŏ jing rơkơi bơnai.

Hrơi plĕ hră ruah khua lơ 23/5/2021, dua rơkơi bơnai ñu tal dua nao plĕ hră ruah khua, ngă tui tơlơi dưi jing sa cô mơnuih ƀôn sang Việt Nam sit nik, tơlơi dưi ngă pô, gơñu ƀuh mơak biă mă hăng pơ-ư ang kơ drơi jăn pô:

“Anai lĕ tal dua kâo dưi nao plĕ hră ruah khua. Rơkơi bơnai gơmơi ƀuh mơak biă mă. Lơ̆m aka ƀu hơmâo anăn jing mơnuih ƀôn sang dêh čar, ƀuh arăng nao plĕ hră rơngôt biă anit glăi drơi jăn pô. Hơdôm hrơi rơgao, khua plơi hăng ƀing ngă bruă amăng să ăt rai pơtô lăi tơlơi phiăn ruah khua, lăi pơthâo mơnuih tơbiă anăn brơi kơ gơmơi thâo. Laih anun, gơmơi nao pơ sang rung plơi kiăng thâo tong ten tơlơi pơhing. Abih dua rơkơi bơnai gơmơi dŏ čang rơmang truh hrơi nao plĕ hră ruah khua đôč yơh”.

Amăng hrơi ruah khua lơ 23/5/2021, ƀơi să guai dêh čar Đak Yuk, tơring glông Ngọc Hồi, tơring čar Kon Tum hơmâo abih bang 410 čô mơnuih djop thun plĕ hră, jing mơnuih phrâo pơmut anăn mơnuih dêh čar Việt Nam mơ̆ng thun 2009 truh thun 2020. Hơdôm čô mơnuih djop thun plĕ hră anai, lu biă mă ƀơi plơi Đak Si hăng Đak Răng. Ơi Bloong Keo, sa čô mơnuih ƀôn sang plơi Đak Si brơi thâo, abih bang ană plơi mut anăn jing mơnuih dêh čar Việt Nam lĕ lêng kơ hơmâo tơlơi hơdip hơđong soh, bruă nao plĕ hră ruah khua lĕ sa bruă mă mơnuih ƀôn sang lăng yôm biă mă pioh pơdah rai tơlơi glăm ba, tơlơi dưi mơ̆ng pô hăng dêh čar Việt Nam:

“Blung hlâo lĕ, Ping gah, Kơnuk kơna hơmâo gleng nao, dăp brơi anih dŏ, anŏ ƀong kơ mơnuih ƀôn sang hơmâo anih dŏ hơđong. Mơnuih ƀôn sang mă bruă gir run biă mă bơwih ƀong huă. Lơ̆m phrâo glăi pưk sang ƀu hơmâo ôh, ră anai phara baih.

Mơnuih ƀôn sang dŏ pơ anai, ngă hrom klă pơgang rơnuk rơnua hơđong. Hơdôm jơlan hơdră, tơlơi pơtrun, bruă ngă mơ̆ng Ping gah, tơlơi phiăn Kơnuk kơna lĕ mơnuih ƀôn sang lêng kơ ngă tui djơ̆ soh. Mơnuih ƀôn sang dưi mă anăn jing mơnuih dêh čar Việt Nam amra djă hla hră nao plĕ ruah khua”.

Rơkơi bơnai bơn A Vơi hăng Y Quên nao ĕp lăng tơlơi pơhing ruah khua ƀơi sang rung plơi

Ơi Phạm Hải Châu, Kơ-iăng Khua git gai ping gah tơring glông, Khua Jơnum min mơnuih ƀôn sang tơring glông, Khua jơnum min ruah khua tơring glông Ngọc Hồi, tơring čar Kon Tum brơi thâo, kiăng djru mơnuih plĕ hră jing mơnuih phrâo mut mă anăn mơnuih dêh čar Việt Nam thâo hluh djop tơlơi dưi, bruă ngă plĕ hră ruah khua mơ̆ng gơñu, khua mua gong gai kơnuk kơna hrom hăng djop khul tơpuôl mơnuih mut phung amăng tơring glông, mơ̆ng akŏ thun 2021 truh ră anai ngă klă bruă pơtô pơblang hăng bruă kiăng ngă “Nao tơl sang phyiăng tơl adring, bưp djop mơnuih”.

Tơring glông pơphun tal hyu pơtô pơblang kơ bruă ruah khua, amăng anun gleng nao biă mă lĕ mơnuih ƀôn sang plĕ hră jing phrâo mă anăn mơnuih dêh čar Việt Nam:

“Ƀing hyu pơtô pơblang hăng ƀing apăn bruă amăng plơi pla nao tơl rĭm sang pơtô hăng tơlơi pơhiăp djuai ania pô brơi mơnuih ƀôn sang thâo hluh Tơlơi phiăn ruah khua, ăt kah hăng tơlơi dưi, bruă ngă mơ̆ng mơnuih ƀôn sang Việt Nam sit nao plĕ hră ruah khua pơ ala mơnuih ƀôn sang dêh čar laih anun ƀing pơ ala mơnuih ƀôn sang djop gưl.

Laih pơtô pơblang tong ten, tum teč hăng rup, pơblang tơlơi pơhiăp kiăng thâo hluh tong ten, djop pô mơak, đăo kơnang amăng tơlơi git gai mơ̆ng Ping gah ngă tui klă tơlơi dưi ruah khua mơ̆ng pô”.

Nay Jek: Pơblang