VOV4.Jarai - Lơ 5/1, Kông ang tơring čar Gialai pơphun Jơnum Klah čun bruă mă thun 2021, pok pơhai jơlan hơdră bruă mă thun 2022. Pơsit bruă mă thun 2021, Kông ang tơring čar Gialai hmâo pok pơhai klă hơdôm bruă mă, mrô hyu pel ĕp, pơsir hơdôm kơđi tơlơi hmâo rơbêh kơ 85,3%, kơđi prong, prong kơtang lĕ rơbêh kơ 90,65%.

Thiếu tướng Rahlan Lâm – Khua Kông ang tơring čar Gialai đĭ pơhiăp amăng mông jơnum

Amăng sa  thun, khul kông ang hmâo mă, pơsur tơbiă phaih tơlơi sôh 116 čô mơnuih pơsit hyu hơduah ĕp, amăng anun hmâo 41 čô mơnuih ngă soh huĭ rơhyư̆t; phă prai lu anih anom, jơlan pơgiăng, răk pioh, blơi sĭ, pơphun mă yua hot jrao. Tơlơi truh ƀơi jơlan glông hmâo hrŏ trun ƀơi 3 mta pơkă. Amăng bruă gum hrom pơgang, pơgăn klin Covid-19, Kông ang tơring čar Gialai hmâo iâu pơhrui hơdôm rơbâo wot čô mơnuih apăn bruă tơhan, ling tơhan ngă bruă. Thun 2022, Kông ang tơring čar Gialai đing nao pok pơhai ha amăng plĕ hơdôm jơlan gah pơhlôm rơnuk rơnua; kơtưn pơgang, pơgăn ƀing ngă soh mơng plơi pla; lăi pơhing, pơsur kiăng plai ƀiă hmâo ƀing ngă soh; hrom hăng anun ngă klă dong bruă pơsur, pơhlôm rơnuk rơnua mơnuih ƀôn sang...

Siu H’ Prăk: Pơblang