VOV4.Jarai - Yua ngă klă bruă pơhlôm pơgang klinCovid-19, Kông ti TNHH Kơphê 15 gah Quân khu 5, Ding jum ling tơhan pơdong ƀơi să Čư̆ Dliê Mnông, tơring glông Čư̆ M’gar, tơring čar Dak Lăk ăt pơkra gơnam sĭ mơdrô dưi mơn, pơhlôm hơmâo prăk kơ ƀing kông ñơn, mơnuih mă bruă.

Kông ti Kơphê 15 jing anom bruă ling tơhan gơgrong pơđĭ kyar bơwih ƀong huă hăng pơhlôm pơgang rơnuk rơnua lŏn ia. Ră anai, anom bruă hơmâo ngă rơbêh 800 hectar kơphê, 300 hectar kơsu, djru brơi 1.200 čô kông ñơn, mơnuih mă bruă hơmâo bruă mă, amăng anun hơmâo rơbêh 170 čô kông ñơn mơnuih djuai ƀiă.

Hăng hơdră ngă bruă “pơkra, pơđĭ kyar hăng rơnuk rơnua” amăng bruă ngă tui “dua mơta bruă hrŏm hrŏm”, hrơi blan rơgao, Kông ti kơphê 15 hơmâo pơgang klin Covid-19 klă, laih dong pơkra gơnam rơnuk rơnua mơn. Anom bruă lăng yôm kơ bruă pơgang klin mơng blung a mơtă. Ƀing kan ƀô̆, ling tơhan, kông ñơn, mơnuih mă bruă lêng ngă tui klă tơlơi pơtrun pơgang klin; hơmâo test hmar kman Covid-19 ƀudah pơčrang kman hăng RT-PCR tui hrơi pơkă. Abih bang rơdêh, gơnam tam mut nao rai amăng anom bruă, sang măi lêng hơmâo pruih jrao pơdjai kman soh...Yua hnun mơn, hơdôm boh sang măi, grup ngă kơphê ăt dŏ ngă bruă na nao mơn.

Amai H’Duân Niê, kông ñơn ƀơi Kông ti Kơphê 15 lăi: Klin ngă sat prong biă kơ sang anŏ ñu, bưp ƀu ƀiă ôh tơnap tap, samơ̆ anom bruă juh alum, djru ba, pơtô ba pơhlôm pơgang klin yua hnun abih bang hơđong pran jua ngă bruă tui bruă jao.

“Kơ bruă pơgang klin lĕ kâo ngă tui djŏp 5K. gah Kông ti djru ba djŏp mơn, ƀơi anŏ tơnap tap lĕ djru ba braih, ia măm, ngôt hra hăng djru ba prăk blan dong kiăng hơmâo prăk ƀong huă rim hrơi”.

Bơ Ayong Ma Văn Tân, mơnuih gơgrong ngă kơphê tui tơlơi rơkâo mơng pô ƀơi Kông ti Kơphê 15 lĕ lăi tui anai:

“Yua hơmâo kông ti lăng ba mơnuih mă bruă mơn, amăng hrơi blan hơmâo klin ăt hơmâo tlâ̆o vaccine kiăng mơnuih mă bruă hơđong pran jua ngă bruă ƀơi anai hăng dŏ hrŏm sui dong hăng kông ti”.

Ơi ia jrao tơhan sem lăng tơlơi suaih pral hăng pơhaih anih nao rai lơ̆m mut nao pơ puih kơđông.

Đại uý, tơhan apăn bruă Nguyễn Thị Thu Ngân, khua grup 3, brơi thâo, truh ră anai 100% čô kông ñơn mơng grup lêng hơmâo tlâ̆o vaccine pơgang Covid-19 laih. Yua hơmâo ngă tui klă bruă pôr pơhing, pơtô pơblang, ƀing khua, ling tơhan, mơnuih mă bruă thâo kơđiăng pơgang klin klă hloh, gir ƀu brơi klin hơđuh đĭ ngă sat kơ bruă pơkra gơnam sĭ mơdrô mơng Kông ti hăng bruă mă mơng mơnuih mă bruă.

“Hăng grup gơmơi, mơng hrơi hơmâo klin lĕ 100% mrô tơhan ƀơi anai lêng rơnuk rơnua. Laih dong bruă pơgang klin hơmâo anom bruă bơni biă, yua dah huăi ngă rung răng amăng ling tơhan wơ̆t hăng kông ñơn ƀơi anai ăt hnun mơn. Bruă ngă mơng grup lĕ ngă kơphê, pơ đang kơphê lĕ dŏ ataih, ƀu hơmâo tơbiă hyu gah rơngiao ôh, yua hnun bruă ngă kơphê ăt hơđong mơn”.

Kông ti Kơphê 15 tlâ̆o vaccine pơgang klin Covid-19.

Tui hăng Đại tá Phạm Xuân Thảnh, Khua kông ti TNHH Kơphê 15, yua pok pơhai hơdră pơgang klin, biă ñu lĕ ngă tui klă tơlơi pơtrun 5K mơng Ding jum ia jrao, truh ră anai Kông ti pơhlôm rơnuk rơnua pơgang klin, djă bong hơđong bruă pơkra gơnam sĭ mơdrô.

“Hơdôm grup ngă bruă amăng puih kơđông kah hăng Grup bơwih ƀong Ling tơhan, hơdôm grup pơkra gơnam lêng hơmâo grup pơgang Covid-19 dŏ gak hrim hrơi, thâo rơđah bruă pơgang klin hăng klin kheng pơplih hiư̆m pă. Gah anom bơwih ƀong ƀu tơguăn kơ prăk djru mơng ƀing khua ôh. Hăng anom bruă ăt pơkra gơnam sĭ mơdrô tui hơđăp mơn. kơnong 9 blan akŏ thun, gơmơi hơmâo ƀong lơi rơbêh 3 klai prăk, rơgao 1,5 wơ̆t pơhmu hăng akŏ bruă mơng thun 2021. Amăng mông tơnap tap samơ̆ Ping gah, ƀing Khua, mơnuih mă bruă ăt gir abih pran ngă bruă mơn”.

Kông ti Kơphê 15, Quân khu 5 lĕ anih hmư̆ hing dưi ngă dua mơta bruă hrŏm: ƀrô pơgang klin rơnuk rơnua ƀrô pơkra gơnam sĭ mơdrô, djru brơi mă bruă hăng hơđong tơlơi hơdip kơ mơnuih mă bruă.

Tuấn Anh: Čih - Siu H’Mai: Pơblang