VOV4.Jarai-Ƀơi anăp kơ tơlơi pơhing klin Covid 19 kơtang, mơ̆ng thun 2020, Sang bruă apui lơtrik tơring čar Dak Lak hơmâo mă yua gru QR Code pioh ĕp lăng amăng internet pơtruh hăng anih wai lăng ƀing tuai pơkĕ yua apui lơtrik, jơlan bơwih brơi mơ̆ng dêh čar, pơsir tơlơi kiăng mơ̆ng mơnuih ƀôn sang tơring čar Dak Lak, djru kơ ƀing tuai dŏ pơ sang đôč dưi ngă tui djop bruă kiăng pơsir gah apui lơtrik mơ̆ng ataih.

Anŏ pơƀuh duh prăk hăng gru kơnăl QR Code amăng website cskh.cpc.vn

Mơ̆ng anun, dơ̆ng mơ̆ng akŏ thun 2021 truh ră anai, kông ty hơmâo tŭ mă hăng pơsir rơbêh 56.000 tơlơi rơkâo pơsir anŏ kiăng mơ̆ng mơnuih yua apui lơtrik kơnang kơ plang internet: Kah hăng pơkĕ phrâo apui lơtrik; bơblih jua kơtang hrĕ apui lơtrik, bơblih hơdră kiăng yua apui lơtrrik; bơblih mông pơkă mrô apui lơtrik ta juăt kông tơr apui, bơblih anih dưm anŏ pơkă mrô apui lơtrik, čih hră rơkâo mơ̆ng ataih mơ-it amăng internet....

Giong anun pơsit rơnoh prăk ăt tla hăng điện tử soh mơ̆n, pơtô brơi kơ tuai duh prăk mơ̆ng ataih hnong tal 4. Tui hăng anun, bruă tla prăk online mă yua boh thâo Zalopay, Momo, Payoo, Vimo ƀudah mă yua gru kơnăl mơ̆ng sang bruă prăk QR-Code, jơlan tla prăk VNpay. Rơnoh prăk hơmâo duh tui jơlan anai 8 blan rơgao truh kơ 2 klai 100 klăk prăk.

Nay Jek: Pơblang