VOV4.Jarai - Yang hrơi dong lơ 21/10, sa čô čơđai sang hră anih 12C2, sang hră gưl tlâo Trần Quốc Tuấn ƀơi tơring kual Đăk Hà, tơring glông Đăk Hà, Kontum ƀuh ƀă virus Sars-Cov2. Tơlơi lăi pơthâo mơng Khua sang hră brơi ƀuh, 50 čô čơđai hăng nai pơtô jê̆ giăm hăng pô anai hăng hơmâo ba nao pơčlah pơƀut pioh pơgang klin.

Sang hră gưl tlâo Trần Quốc Tuấn hơdai nao hrăm lăng nao rai mơng ataih lơ̆m ƀuh mơnuih F0 lĕ čơđai hrăm hră

Hlâo anun, Khua sang hră gưl tlâo Trần Quốc Tuấn hơmâo brơi ƀing čơđai hăng nai pơtô hăng mơnuih F0 pơčlah pơ sang. Mơng yang hrơi tlam Sang hră gưl tlâo Trần Quốc Tuấn pơphun hrăm lăng nao rai mơng ataih. Anom bruă pơgang klin kman Kontum hăng anom bruă ia jrao tơring glông kiăo tui ĕp mơnuih jê̆ giăm kiăng kơ ba nao pơčlah pơƀut hăng mă ia adung pơčrang lăng ƀơi sang hră gưl tlâo Trần Quốc Tuấn.

Grup pel ĕp hăng mă ia adung pơčrang lăng ƀing jê̆ giăm hăng mơnuih F0

Hơmâo thâo čơđai ƀă klin lĕ L.T.H.G, aka ƀu tlâ̆o vaccine, ƀă klin Covid-19 mơng sa čô đah kơmơi dŏ hơdip pơ phường Tân Phú, plơi prong Đồng Xoài, Bình Phước, pô đah kơmơi anai phrâo pơgiong pơčlah pơƀut. Gơnong bruă ia jrao Kontum hăng anom bruă bơdjơ̆ nao tơring čar Kontum glăk ječ ameč kiăo tui ĕp, pơčrang lăng ƀing jê̆ giăm him lăng hơmâo 5 čô F0. Blung hlâo anom bruă bơdjơ̆ nao pơsit hơmâo giăm 230 čô mơnuih F1.

Siu Đoan: Pơblang