VOV4.Jarai - Tlam lơ 12/11, ƀơi plơi prong Kontum, gơnong bruă ia jrao tơring čar Kontum pơphun mông bưp ƀô̆ mơta, pơpŭ hăng jao hră bơni mơng Khua Jơnum min mơnuih ƀon sang tơring čar Kontum brơi 30 čô nai ia jrao, ơi ia jrao amăng tơring čar lơ̆m pơgiong bruă djru brơi tơring čar Bình Dương amăng pơgang klin Covid-19. Đĭ pơhiăp amăng mông bưp ƀing, nai ia jrao CKII Võ Văn Thanh, Khua gơnong bruă ia jrao tơring čar Kontum pơpŭ bơni pran jua thâo gum djru khăp pap, găn rơgăn tơnap tap, hŭi rơhyư̆t mơng 30 čô nai ia jrao, ơi ia jrao nao djru brơi tơring čar Bình Dương gum tơngan hrŏm amăng bruă pơgang klin Covid-19.

Jao hră pơpŭ mơng Jơnum min mơnuih ƀon sang tơring čar Kontum brơi ƀing nai ia jrao,ơi ia jrao djru pơgang klin Covid-19 ƀơi Bình Dương

Khua anom bruă ia jrao tơring čar Kontum pơdah tơlơi čang rơmang, amăng hrơi blan hơmâo klin Covid-19 amăng tơring čar Kontum glăk tơnap tap, ƀing nai ia jrao, ơi ia jrao djă pioh tơlơi găn rơgao amăng bruă mă nao djru pơgang klin ƀơi tơring čar Bình Dương pơgôp hrŏm hăng gơnong bruă ia jrao amăng tơring čar pơgang hĭ klin, pơhlôm brơi tơlơi suaih pral kơ mơnuih ƀon sang.

Siu Đoan: Pơblang