VOV4.Jarai - Ƀơi anăp kơ bruă lu mơnuih ƀơi ƀôn prong Hồ Chí Minh kơƀah añăm tam amăng hơdôm hrơi pơčlah mơnuih mơnam pioh pơgang klin Covid-19, mơng mơguah tom brơi (12/7), lu khul grup, ƀing mơnuih čơmah, grup djru mơnuih mơnam hăng hơdôm rơtuh čô mơnuih ƀơi tơring čar Kontum hơmâo pơphun hyu pơƀut glăi añăm tam djơ̆ hăng mrô pơkă lĕ truh tal hrơi anai lơ 13/7 amra pơdŭ nao giăm 10 tơ̆n añăm tam djru brơi mơnuih ƀơi ƀôn prong.

Gum hrŏm amăng bruă djru añăm tam brơi mơnuih ƀơi ƀôn prong Hồ Chí Minh, djop khul grup, ƀing mơnuih čơmah, grup gum djru mơnuih mơnam ƀơi tơring čar Kontum pơkă amra pơƀut glăi giăm 10 tơ̆n añăm tam mơ-it nao ƀôn prong. Hrŏm hăng anun hơmâo hơdôm añăm dưi yua mơtăm anun lĕ añăm hơboi, añăm ƀar, añăm hơtŭ …bơ plôi, get ia, rơtă dưi pioh yua amăng sui hrơi. Khua grup Kâo khăp kơ Kontum brơi thâo, hơdră pơdŭ pơgiăng hăng ba nao añăm tam amăng hrơi blan hơmâo klin Covid-19 ăt sem lăng tong ten kiăng añăm tam dưi truh tơl tơngan mơnuih ƀơi ƀôn prong tañ hloh hăng rơnuk rơnua.

Siu Đoan: Pơblang