VOV4.Jarai - Ƀơi tơring čar Kontum amăng lơ 23/5, hmâo giăm truh 347.000 čô mơnuih hmâo anăn nao ruah khua mơng tơring čar nao plĕ hră ruah khua amăng Hrơi jơnum prong mơng lŏn ia kiăng ruah mơnuih hmâo pran jua klă, thâo rơgơi. Ngă lơphet pok phun bruă ruah khua ƀơi 660 bôh kual plĕ hră amăng tơring čar dưi pơphun tâ̆o klă, rơguăt, djơ̆ tơlơi pơkă hăng pơdah tơlơi Hrơi jơnum ruah khua abih bang mơnuih ƀôn sang. Ƀơi hơdôm anih anom kual plĕ hră leng kơ hmâo ƀing ơi ia jrao ngă bruă pơgang pơgăn klin Covid-19 hăng mơnuih ƀôn sang leng kơ ngă tui klă tơlơi pơtă mơng mơnuih apăn bruă ia jrao. Tơdơi kơ pơ ala brơi rơbêh kơ 1.100 čô mơnuih ruah khua plơi Kon Hra Chót, gah kual ruah khua mrô 6, phường Thống Nhất, plơi prong Kontum plĕ hră ruah khua blung a amăng kơthung mơtăm, mơnuih ƀôn sang A Huy mơ-ak brơi thâo:

“Neh wa rơgao hăng anai ăt 2, 3 hrơi laih neh wa čang rơmang truh hrơi ruah khua. Kâo lĕ tha plơi Kon Hra Chót. Plơi ƀing gơmơi mơ-ak ruah mă hơdôm mơnuih pơ ala mơnuih ƀôn sang, Khul djop bôh thâo. Tơdah hlơi dưi ruah mut amăng khul, khua pơ ala mơnuih ƀôn sang ăt čang rơmang mơn ngă hiưm hơpă djru brơi neh wa”.

Amăng hrơi ruah khua pơ ala mơnuih ƀôn sang dêh čar ta tal 15 hăng khua pơ ala Khul pơ ala mơnuih ƀôn sang hơdôm gưl, rơwang bruă 2021-2026, tơring čar Kontum hmâo 2 Grŭp ruah khua ƀơi 2 bôh anom ruah khua pơ ala mơnuih ƀôn sang dêh čar; 13 Grŭp ruah ƀơi hơdôm bôh anom ruah khua pơ ala Khul pơ ala mơnuih ƀôn sang tơring čar; 83 Grŭp ruah khua pơ ala Khul pơ ala mơnuih ƀôn sang gưl tơring glông hăng 625 Grŭp ruah khua pơ ala Khul pơ ala mơnuih ƀôn sang gưl să. Mơnuih ruah khua tơring čar Kontum amra ruah mă, ruah 6 čô khua pơ ala mơnuih ƀôn sang dêh čar ta mơng 10 čô mơnuih tơbiă anăn; ruah 50 čô khua pơ ala Khul pơ ala mơnuih ƀôn sang tơring čar mơng 85 čô mơnuih tơbiă anăn; ruah 316 čô khua pơ ala Khul pơ ala mơnuih ƀôn sang tơring glông mơng 531 čô mơnuih tơbiă anăn hăng 2.132 čô khua pơ ala Khul pơ ala mơnuih ƀôn sang să mơng 3.607 čô mơnuih tơbiă anăn./.

Siu H’ Prăk: Pô pơblang