VOV4.Jarai -  Ƀơi tơring čar Kontum amăng sa hrơi mlăm rơgao hmâo hơjan prong truh hơjan prong prin, mrô ia hơjan hmâo mơng 80 – 240 mm hăng gong gai tơring čar hmâo čih pioh laih sa dua anô răm rai.

Ƀơi akô̆ tơdrông toa yôl găn ia krông Pô Kô pơ̆ tơring kual Đăk Glei, tơring glông Đăk Glei lŏn tơhlom

Mơguah kơ 17/10, Jơnum min mơnuih ƀôn sang tơring čar Kontum hmâo hră mơ-ĭt tañ kơ hơdôm gơnong bruă, grŭp, anom bruă gah tơring čar hăng Jơnum min mơnuih ƀôn sang 10 bôh tơring glông, plơi prong gơgrong hlâo bŏng glăi hăng hơjan ia ling dăo, ia ling kor hăng lŏn tơhlom. Răm rai blung a yua kơ hơjan ba truh dưi čih pioh hăng glông jơlan nao rai.

Anih ia ling dăo ƀơi tơdrông toa blai pơ̆ jơlan mut amăng să Đăk Pxi, tơring glông Đăk Hà

Yua kơ hơjan prong, ia ƀơi hơdôm bôh ia krông čroh hnoh đĭ prong, ƀơi tơring glông Đăk Glei, sa bôh tơdrông toa găn ia krông Pô Kô tô tơring kual Đăk Glei hăng 2 bôh plơi Đông Sông, Đông Thượng hmâo ia ling kor tơkai tơdrông toa. Gong gai tơring glông brơi hlă hnal lăi pơthâo, pơkiăo nao mơnuih dô̆ găk pơtô brơi mơnuih ƀôn sang nao jơlan dar găn tơdrông toa pơkon. Tơlơi hơjan ngă lŏn tơhlom plăng jơlan ngă gun jơlan nao rai ră anai ăt hmâo mơn ƀơi sa dua ară jơlan ƀơi tơring glông Kon Plông hăng Tŭ Mrông./.

Siu H’ Prăk: Pô pơblang