VOV4.Jarai - Kiăng kơ ba glăi tŭ yua hloh amăng bruă pơgang klin Covid-19, Jơnum min mơnuih ƀon sang tơring čar Kontum hơmâo pơsit, pơdong glăi 6 anih wai pơgang klin amăng tơring čar, amăng anun jao khua Jơnum min mơnuih ƀon sang tơring glông, plơi prong git gai ƀơi hơdôm anih dŏ gak anai. Tui hăng tơlơi pơsit mơng Khua Jơnum min mơnuih ƀon sang tơring čar Kontum, hơmâo 6 anih wai pơgang klin Covid-19 amăng tơring čar hơmâo pơdong kiăng kơ ngă kjăp dong amăng bruă pơgang klin.

Črâo brơi rơdêh mut nao pơ anih dŏ gak kiăng pơgang klin Covid-19 Sao Mai - giăm guai tơring Gialai

6 anih dŏ gak hơmâo pơdong ƀơi hơdôm jơlan pơprong amăng tơring čar, anun lĕ jơlan mrô 14 - jơlan Hồ Chí Minh - ară jơlan gah kơdư hăng gah dơnung tơring čar Kontum; jơlan pơkuh nao rai Đông Trường Sơn hăng jơlan mrô 24 - giăm tơring čar Quảng Ngãi; ƀơi tơdrông Sê San 4, jơlan mrô 14C hăng jơlan mrô 40C ƀơi ară jơlan găn nao hăng tơring glông Nam Trà My, tơring čar Quảng Nam hăng să Ngọc Lây, tơring glông Tu Mơ Rông.

Siu Đoan: Pơblang