VOV4.Jarai - Jơnum min mơnuih ƀôn sang tơring čar Kontum phrâo mă yua kơčăo bruă ngă tui Akô̆ bruă hrŏ trun tơlơi pơdô̆ rơkơi bơnai mơng muai hăng pơdô̆ giăm drah kơtak ƀơi tơring čar mơng thun 2021-2025 kiăng djru pơđĭ tui anô̆ klă mrô mơnuih hăng mơnuih mă bruă ƀơi kual djuai ania ƀiă dô̆. Akô̆ bruă ba tơbiă tơhnal pơkă pơđĭ tui tơlơi pơmin hăng ngă tui tơlơi phiăn, pơplih bruă ngă amăng pơdô̆ rơkơi bơnai mơng neh wa djuai ania ƀiă, djru plai ƀiă tơlơi pơdô̆ rơkơi bơnai mơng muai hăng pơdô̆ giăm drah kơtak amăng neh wa kual djuai ania ƀiă. Mơta pơkon hrưn đĭ hmâo rơbêh kơ 90% mrô mơnuih apăn bruă gah djuai ania hơdôm gưl, mơnuih apăn bruă bôh thâo – mơnuih mơnam dưi pơhrăm pơđĭ tui bôh thâo, hơdră pơsur pơtrut, lăi pơthâo, lăi pơhing pơplih bruă pơdô̆ rơkơi bơnai mơng muai hăng pơdô̆ giăm drah kơtak amăng kual neh wa djuai ania ƀiă amăng thun 2025. Hrom hăng anun truh thun 2025, hrưn đĭ pơgăn, ngă plai ƀiă tơlơi pơdô̆ rơkơi bơnai mơng muai hăng giăm drah kơtak amăng kual djuai ania ƀiă dô̆./.    

Siu H’ Prăk: Pô pơblang