VOV4.Jarai - Mơguah lơ 22/4, Jơnum min djop djuai ania mơnuih mơnam dêh čar Việt Nam tơring čar Kontum pơphun Bruă pơsur kiăng pơplih tơlơi pơmin, bruă mă mơng neh wa djuai ania ƀiă, djru neh wa hrưn đĭ tơtlaih mơng rin rơpa kơjăp sui thun.

Tơring čar Kontum hmâo rơbêh kơ 53% mrô mơnuih lĕ djuai ania ƀiă tơlơi hơdip mơda dô̆ bưp lu tơlơi tơnap. Bôh than ba truh tơnap lĕ yua kơ tơlơi hrăm hră ƀu lu; tơlơi pơmin dô̆ tơguan, ah gơnang tơlơi gum djru mơng Kơnuk kơna ăt dô̆ mơn; akă thâo hơdră mă yua bôh thâo phrâo amăng bruă ngă đang hmua. Kiăng pơplih tơlơi pơmin, bruă mă mơng neh wa djuai ania ƀiă, ngă brơi neh wa hrưn đĭ tơtlaih mơng rin rơpa kơjăp phik, Jơnum min djop djuai ania mơnuih mơnam dêh čar Việt Nam tơring čar Kontum pơsit 5 bruă mă phun, anun lĕ: Lăi pơhing, lăi pơthâo hơdôm hơdră pơtrun, hơdră bruă gum djru sa lĕ bruă lŏn drŏn, pơhrŏ trun rin rơpa kơjăp, pơdŏng plơi pla phrâo truh hăng neh wa djuai ania ƀiă; Lăi pơthâo hơdôm hơdră klă, ba glăi bôh tơhnal; Pơtô brơi neh wa ƀun rin hăng ƀun rin ƀơ ƀiă mă yua ba glăi bôh tơhnal ngăn rơnoh mơng sang anô̆, prăk čan pioh pơđĭ kyar bơwih ƀong; Pơtô brơi neh wa pơplih hơdôm djuai phun pla, hlô rông; gum hrom klă pla kyâu, pơgang hăng wai lăng dlai klô./.

Siu H’ Prăk: Pô pơblang