VOV4.Jarai - Čơtlăm lơ 29/7, Grŭp črâo ba bruă pơgang, pơgăn klin Covid-19 tơring čar Kontum hmâo lăi pơthâo sit nik kơ bruă pơdŏng 2 anih brơi ia xăng kơ mơnuih ƀôn sang đĭ rơdêh thut glăi mơng kual klin ngă. Kiăo tui anun, 2 anih anom pơdơi dŏng glăi hăng djru ia xăng ƀơi tơring čar Kontum dưi pơha ƀơi 2 ară jơlan.

Djru ia xăng kơ mơnuih ƀôn sang ƀơi anih sĭ ia xăng 124

Hăng jơlan 14 – jơlan Hồ Chí Minh lĕ Anom sĭ ia xăng 124, črăn Km 1475, gah plơi Dục Nội, să Đak Nông, tơring glông Ngọc Hồi. Hăng jơlan 24 lĕ ƀơi Anom sĭ ia xăng 118, črăn Km 117+237, gah tơring kual Măng Đen, tơring glông Kon Plông. Abih bang mơnuih ƀôn sang đĭ rơdêh thut glăi mơng kual klin ngă, lom truh pơ̆ anih pơdơi anai, dưi djru ia xăng rim rơdêh 2 lit ia xăng hăng dưi mă yua hơdôm bruă tŭ yua ƀơi anih sĭ ia xăng.

Mơnuih mơng Anom sĭ ia xăng pơhlôm pơgang klin prăp lui djru mơnuih ƀôn sang

Dưi thâo, Anom ia xăng Kontum hmâo ngă tui laih bruă djru ia xăng kơ mơnuih ƀôn sang glăk mơng anih klin ngă ƀơi 2 anih anom sĭ ia xăng mơng lơ 25/7. Kơnong kơ lơ 29/7, 2 bôh anom anai hmâo čơkă jum laih 850 čô mơnuih hăng djru ia xăng brơi kơ 390 wot rơdêh thut./.

Siu H’ Prăk: Pô pơblang