VOV4.Jarai - Mơguah lơ 14/7, ƀơi Pơsat ling tơhan pơsăn drơi tơring čar Kontum, Ping gah plơi prong, Khul pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam plơi prong Kontum ngă lơphet jôk atâo, lăi pơthâo hăng ba nao dor tơlang tơleh 2 čô ling tơhan pơsăn drơi amăng hơdôm rơnuk blah ngă phrâo dưi tum pơƀut ƀơi plơi prong. Tơlang tơleh anai dưi hmâo Grŭp git gai Khul ling tơhan plơi prong Kontum gum hrom hăng Grŭp git gai Khul ling tơhan să Ngọc Bay hăng Kroong tum pơƀut hmâo amăng hơdôm hrơi akô̆ blan 7 mơng mơnuih ƀôn sang lăi pơthâo.

Tơlơi pơhing mơng Grŭp git gai Khul ling tơhan plơi prong Kontum brơi thâo, tơlang tơleh ling tơhan anai dưi ĕp ƀuh ƀơi amăng luh blah ngă. Gru gơnam dô̆ glăi hmâo sum ao ling tơhan hăng wot dua gơñu leng dưi hmâo arăng pơsit anăn păn laih. Amăng rơnuk blah kơdŏng ayăt Mi pơtlaih rơngai lŏn ia ƀơi plơi prong Kontum, tơring čar Kontum lĕ anih blah ngă kơtang tit. Rơbêh kơ 46 thun tơdơi kơ tlaih rơngai kual Dơnung dêh čar pơlir hơbit lŏn ia, Ping gah, Gong gai, khul apăn bruă hăng mơnuih ƀôn sang plơi prong Kontum ăt dô̆ hyu hơduah ĕp, tum pơƀut mơn tơlang tơleh ƀing ling tơhan dô̆ đih glăi ƀơi anih blah ngă./.

Siu H’ Prăk: Pô pơblang