VOV4.Jarai -  Gơnong bruă pơtô pơhrăm tơring čar Kontum hmâo pơsit pok phun thun hrăm phrâo 2021-2022 hăng čơđai sang hră hơdôm gưl amăng lơ 5/9 hăng hrơi tơdơi lơ 6/9 pơphun hrơi hrăm blung a. Kiăng pơhlôm amăng hơdôm hrơi klin Covid-19 ngă tơnap hăng ƀing čơđai kual asuek, ataih, kual neh wa djuai ania ƀiă hmâo djop gơnam yua hrăm hră kơ thun hrăm phrâo, Grŭp Khua hơdôm bôh Sang hră ƀơi Kontum glăk ngă giong klă bruă prăp lui.

Sang hră gưl 2 Văm Lem, să Văn Lem, tơring glông Đăk Tô pla phun kyâu ƀơi bah amăng war sang hră

Truh mông anai abih bang kah hăng hơdôm bôh sang hră ƀơi hơdôm bôh tơring glông kual asuek, ataih, kual djuai ania ƀiă, kah hăng Đak Glei, Tu Mrông, Kon Plông... mơng tơring čar Kontum hmâo ngă giong bruă agaih anih hrăm sang hră. Khua Sang hră gưl sa Nguyễn Văn Cừ, ƀơi să tơnap tap Đăk Pxi, tơring glông Đăk Hà, brơi thâo thun hrăm phrâo anai sang hră hmâo 278 čô čơđai sang hră hăng rơbêh kơ 90% lĕ ană bă djuai ania ƀiă Hơdang. Truh mông anai bruă prăp lui kơ hrơi pok phun thun hrăm phrâo mơng sang hră phun ñu ngă giong laih./.

Siu H’ Prăk: Pô pơblang