VOV4.Jarai-Tom brơi, lơ 13/9, ơi Phạm Minh Chính Khua dêh čar ta hơmâo jơnum lăng nao rai amăng tivi hăng tơring čar Tiền Giang hăng Kiên Giang kơ bruă mă pơhlôm, pơgang klin Covid 19. Klah čun ƀơi mông jơnum, ơi Phạm Minh Chính lăi pơtong, jơnum mơ̆ng ataih lăng nao rai amăng tivi hăng dua boh tơring čar anai, pơtruh tơl să, phường, tơring kual pioh abih bang hmư̆ tơlơi pơgôp hiăp mơ̆ng mơnuih rơgơi kơhnâo, đah mơ̆ng ngă klă bruă pơjrao hăng pơgang klin.

Rup jơnum abih bang lăng nao rai amăng tivi

Dua boh tơring čar Kiên Giang hăng Tiền Giang hơmâo gir run lu biă  mă, ngă tui hơdră pơčlah mơnuih mơnam 2 blan hăng anai, samơ̆ hơdôm wơ̆t hrơi tơjuh rơgao, tơlơi pơhing klin kheng ăt kơtang đôč. Khua dêh čar lăi lĕ, hơmâo mơ̆ng bruă git gai, pơčrâo bruă mơ̆ng khua mua, wơ̆t hăng bruă pơphun ngă tui aka ƀu djơ̆ ôh. Giong pơčrông sai ƀơi gưl tơring čar, să phường ƀuh rơđah hơdôm bruă ngă hrom anai dŏ kơƀah biă mơ̆n, aka ƀu tong ten pơlir hơbit pơphun bruă mă, dŏ sư̆ rơbư̆; lăng lui hlâo tơlơi pơhing klin aka sit nik ƀu djơ̆ hăng tơlơi pơhing hlăk hơmâo.

Khua dêh čar git gai tơring čar Tiền Giang hăng Kiên khom gir run hloh amăng bruă pơhlôm, pơgang klin Covid 19, tañ pơgăn anăm brơi lar hyu lu tơlơi duăm ruă.

Nay Jek: Pơblang