VOV4.Jarai - Kơ-iăng khua dêh čar Lê Minh Khái phrâo kĭ hơdôm tơlơi pơsit kơ bruă jao braih, sang păng mă hăng ƀat, măi pơđuăi apui lơtrik mơng gơnam djă pioh dêh čar brơi hơdôm tơring čar Gialai, Bình Phước, Sóc Trăng kiăng kơ djru brơi mơnuih ƀon sang bơbeč nao kơtang mơng klin hăng djru amăng bruă wai pơgang klin Covid-19. Tui anun, Kơ-iăng khua dêh čar jao Ding jum prăk kak jao ƀu kiăng tla glăi prăk hăng rơbêh 208 tơ̆n braih mơng anih djă pioh gơnam yua dêh čar brơi tơring čar Gialai. Tơdah dong mơng hrơi djru ăt dŏ ƀuh tơnap tap, Jơnum min mơnuih ƀon sang tơring čar Gialai lăi pơthâo Ding jum bruă mă, tơhan rơka hăng mơnuih mơnam, Ding jum prăk kak kiăng hơmâo hră mơ-it Khua dêh čar sem lăng, tŏ tui djru brơi dong. Tal djru anai, Kơ-iăng khua dêh čar ăt hơmâo jao Ding jum prăk kak djru brơi sang păng mă hăng ƀat, măi pơđuăi apui lơtrik mơng gơnam djă pioh dêh čar brơi kơ Jơnum min mơnuih ƀon sang tơring čar Bình Phước, Sóc Trăng kiăng kơ djru amăng bruă pơgang klin Covid-19 hăng rĭm boh tơring čar djru brơi 30 sang păng mă hăng ƀat, 2 boh măi pơđuăi apui lơtrik 30 KVA.

Siu Đoan: Pơblang