VOV4.Jarai - Čơtlăm lơ 11/8, gah yŭ tơlơi git gai mơng Khua dêh čar ta ơi Phạm Minh Chính, Kơnuk kơna hmâo jơnum laih kơ bruă pơgang, pơgăn Covid-19; tơlơi pơđĭ kyar bơwih ƀong – mơnuih mơnam blan 7 hăng 7 blan thun 2021; hơdôm bruă mă, jơlan gah pơsir phun pơtlaih tơlơi tơnap, pơđĭ kyar bơwih ƀong – mơnuih mơnam hơdôm blan rơnuč thun 2021 tui hơdră lăng nao rai mơng ataih kơplah wah Kơnuk kơna hăng hơdôm anih anom amăng đơ đam dêh čar ta. Tui hăng Khua dêh čar, anai lĕ dua bruă mă yôm phăn hrom hrom hăng hmâo tơlơi rô nao rai kơjăp, jê̆ giăm. Tui hăng tơlơi črâo ba mơng Khua dêh čar, Khua hơdôm bôh tơring čar, ƀôn prong hăng ƀing ding kơna Kơnuk kơna đing nao pơblang hơdôm bôh tơhnal, bôh than hăng wot hơdôm anô̆ akă dưi ngă lom ngă tui hơdôm bruă mă amăng hơdôm hrơi rơgao; lăng tui hơdôm tơlơi găn rơgao, biă ñu amăng bruă pơgang, pơgăn Covid-19 hăng hơkrŭ bruă bơwih ƀong huă, sĭ mơdrô; pơkă lăng hlâo tơlơi, biă ñu lĕ hơdôm tơlơi tơnap, tơlơi gêh gal, tơlơi lông; črông lô hơdôm jơlan gah, bruă mă, jơlan gah pơsir ngă tui hơdôm blan rơnuč thun 2021./.

Siu H’ Prăk: Pô pơblang