VOV4.Jarai-Mơguah tom brơi, lơ 6/9, yua khua dêh čar ơi Phạm Minh Chính git gai, kơnuk kơna jơnum lok bruă blan 8 thun 2021 pioh pơčrông sai tơlơi bơwih ƀong huă mơnuih mơnam blan 8 hăng 8 blan thun 2021; tơlơi pơhing pok pơhai ngă tui Hră pơtrun mrô 01/NQ-CP mơ̆ng Kơnuk kơna, tơlơi pơhing bơwih ƀong huă mơnuih mơnam thun 2021 laih anun him lăng ngă tui akŏ bruă thun 2022; tơlơi pơhing ngă tui tuh pơ alin kơ bruă čar thun 2021 laih anun akŏ bruă thun 2022; akŏ bruă bơwih ƀong huă 5 thun mơ̆ng thun 2021-2025 hăng hơdôm mơta tơlơi yôm pơkŏn.

Ƀơi mông jơnum, Khua dêh čar ơi Phạm Minh Chính pơtrun hiăp kơ djop ding jum anom bruă čih pơƀut glăi rơkâo djop bruă, djop tơring čar lăi pơthâo rơnoh prăk bơwih brơi kơ bruă pơgang klin; Ding jum Bruă mă Tơhan rơka hăng mơnuih mơnam kơsem min lăng pơbuă tui rơnoh prăk djru kơ mơnuih dŏ mă bruă pơ anăp pơgang klin; Ding jum wai lăng jơlan glông hăng pơdŭ pơgiăng khom sem lăng tơlơi pơtrun, pơhlôm brơi bruă pơgiăng gơnam, pơgiăng mơnuih khom hơmâo tơlơi git gai djơ̆ sa hnong.

Rơkâo djop anom bruă tañ sem lăng pơsir tơlơi bơwih ƀong huă pơđĭ kyar mơnuih mơnam amăng rơnuk mă bruă hơdră phrâo.

Nay Jek: Pơblang