VOV4.Jarai - Kơ-iăng khua dêh čar ơi Vũ Đức Đam kĭ Tơlơi pơtrun kơ bruă kiăng ngă, hơdră pơđĭ kyar sa, dua hră pơhing in hăng hră pơhing điện tử bruă pơtom hiăp hăng tač rơngiao rơwang thun 2022-2030. Tơlơi kiăng ngă lĕ hră pơhing in Việt Nam News, hră pơhing Báo Ảnh Việt Nam hăng Hră pơhing Điện tử VietnamPlus mơng Thông tấn xã Việt Nam jing tơlơi pơhing in ƀơi hla pơ-ar hăng tơlơi pơhing điện tử bruă pơtom hiăp mơng dêh čar ta, ngă klă bruă pôr pơhing gah tơlơi pơtom hiăp hăng tač rơgiao, jơlan hơdră ngă bruă mơng Ping gah, tơlơi phiăn mơng Kơnuk kơna. Bruă ngă hăng hơdră pơsir pơđĭ kyar tơlơi pơhing in hăng tơlơi pơhing điện tử gah bruă pơtom hiăp hăng čar rơngiao rơwang thun 2022-2030 lĕ pơđĭ tui mrô tơlơi pơhing hăng anŏ klă. Rơđah biă ñu, pơđĭ tui mrô tơlơi pơhing hăng anŏ klă mơng tơlơi pơhing, pôr pơhing tañ, lăp djơ̆, lăi nao bruă hơmâo amăng lŏn ia hăng ană mơnuih Việt Nam. Pơplih na nao tơlơi pôr pơhing, pơđĭ tui mrô tơlơi pơhing, anŏ klă mơng djŏp črăn tơlơi pơhing. Pơkra tơlơi pơhing pôr tui lu glông, lăp djơ̆ hăng tơlơi pôr pơhing rơnuk phrâo, mă yua boh thâo măi mok mrô, čih pơmut tơlơi pơhing amăng djŏp glông internet kiăng arăng pơđok lu.

Siu H’Mai: Pơblang