VOV4.Jarai - Kiăng djru hăng bơwih brơi hmao tlôn, ba glăi bôh tơhnal kơ bruă pơgang, pơgăn klin Covid-19 ƀơi ƀôn prong Hồ Chí Minh hăng hơdôm bôh tơring čar, ƀôn prong kual Dơnung dêh čar, Khua dêh čar ta phrâo kĭ hră pơ-ar 970 kơ bruă pơdŏng “grŭp mă bruă pha ra” pơgang, pơgăn klin Covid-19. Khua dêh čar ta rơkâo ƀing Khua Ding jum: Ding jum khul ling tơhan; Ding jum sĭ mơdrô; Ding jum đang hmua hăng pơđĭ kyar ƀôn lan; Ding jum wai lăng jơlan nao rai dŭ pơgiăng; Ding jum man pơdŏng; Ding jum wai lăng tơlơi pơhing hăng pôr pơhing; Ding jum wai lăng mơnuih mă bruă, tơhan rơka ruă hăng mơnuih mơnam hluai tui bruă apăn, bruă jao, tơlơi dưi jao, pơdŏng mơtăm “Grŭp mă bruă pha rai” pơgang, pơgăn klin Covid-19 mơng rim Ding jum, gum hrom kơjăp hăng ƀôn prong Hồ Chí Minh hăng hơdôm plơi pla gah Dơnung dêh čar, biă ñu lĕ hơdôm anih anom glăk ngă tui Tơlơi črâo ba mrô 16 gơgrong hlâo pơsir, pơsir mơtăm hơdôm bruă phrâo phun hmâo amăng pơgang, pơgăn klin hăng hơdôm tơlơi bơdjơ̆ nao. Anai lĕ bruă mă yôm phăn biă, ječ biă; Khua dêh čar rơkâo hơdôm Khua ding jum đing nao črâo ba ngă tui, tañ ngă tui ba glăi bôh tơhnal bruă mă mơng grŭp mă bruă pha ra anai./.

Siu H’ Prăk: Pô pơblang