VOV4.Jarai-Mơguah lơ 11/8, pok jơnum blung a khua mua amăng kơnuk kơna dêh čar rơwang bruă thun 2021-2026, kiăng pok pơhai ngă tui Hră pơtrun jơnum ping gah tal XIII hăng Hră pơtrun Khua pơ ala mơnuih ƀôn sang dêh čar tal 15, kơ pơtrut bruă bơwih ƀong huă mơnuih mơnam 5 thun pơ anăp, mơ̆ng thun 2021-2025. Jơnum anai pơphun lăng nao rai amăng tivi hăng hơdôm tơring čar amăng dêh čar, yua Khua dêh čar ơi Phạm Minh Chính git gai.

Pơhiăp ƀơi mông pok jơnum, ơi Phạm Minh Chính Khua dêh čar lăi, Kơnuk kơna tal XV tŭ mă bruă mă lơ̆m rŏng lŏn tơnah hăng amăng dêh čar hơmâo lu tơlơi gêh găl,  tơlơi hơmâo lu mơta hăng tơlơi tơnap tap lông lăng prong mơ̆n, biă mă ñu klin kheng Covid 19 hơmâo djuai kman Delta phrâo ƀă hyu kơtang hloh ƀu dưi thâo hlâo ôh amăng rŏng lŏn tơnah laih anun ƀơi Việt Nam ta, ngă pơhŭi truh kơ tơlơi suaih pral, pran jua, drơi jăn mơnuih ƀôn sang, bơbeč kơtang kơ tơlơi bơwih ƀong huă mơnuih mơnam amăng dêh čar.

Hơmâo Khua git gai ping gah hăng khua mua amăng lŏn ia, kơnuk kơna tal XV jơnum hrom kơnuk kơna blung a, jing mông jơnum yôm pơphăn hăng tơlơi gir run phrâo mơ̆ng Kơnuk kơna mă bruă tơpă, hur har, tŭ yua, yua kơ mơnuih ƀôn sang khom bơwih bơwăng mă bruă. Jơnum anai, pơtum pơčrông sai, tŭ ư hĭ hơdôm bruă mă phun yôm amăng djop bruă mă lơ̆m dêh čar 5 thun pơ anăp.

Nay Jek: Pơblang