VOV4.Jarai-Sa boh yôm phun hơmâo lăi pơthâo amăng mông jơnum khua mua apăn bruă ping gah dêh čar lok 4 tal 13 bơkơtuai nao rai, anun lĕ: pơjing rai sa tơlơi tŭ ư hrom djop jơlan hơdră, tơhnal pơtrun, bruă ngă hăng hơdră pơsir kiăng kơtưn akŏ pơdong ping gah, ƀư̆ pơkra ping gah; pơgăn hăng pơtrut đuăi anŏ răm ƀăm amăng tơlơi pơmin pran jua, tơlơi dŏ dong ƀong huă ƀu klă, tơlơi pơblih mă pran jua amăng rĭm čô mơnuih ping gah.

Khua git gai ping gah ơi Nguyễn Phú Trọng đĭ pơhiăp git gai jơnum

Hră lăi pơthâo amăng mông jơnum brơi ƀuh: 5 thun rơgao, hơmâo rơbêh 87 rơbâo čô mơnuih ping gah arăng pơsir ngă soh, amăng anun 46 rơbâo čô mơnuih ping gah arăng pơsir kơđi ngă soh yua pơblih sat tơlơi pơmin pran jua, tơlơi hơdip mơda, pơblih mă ƀu klă. Tơlơi anai brơi ƀuh, bruă pơhlôm hăng pơgăn tơlơi soh ƀong kông ngăn hơmâo sa yak phrâo prong laih, samơ̆ ăt aka ƀu ngă djơ̆ anŏ kiăng akŏ pơdong, ƀư̆ pơkra ping gah lơi kiăng kjăp kơtang hăng rơgoh sit nik.

Tui hăng Khua git gai ping gah ơi Nguyễn Phú Trọng: tơlơi soh sat, hŭi rơhyưt biă mă lĕ răm ƀăm pơblih sat tơlơi pơmin, pran jua kơđi čar, tơlơi dŏ dong ƀong huă ƀu tơpă, ngă sat truh ƀong kông ngăn. Tơlơi anun, kah hăng ñu pơblih mă mơ̆ng lăm pran jua truh bruă ngă sit nik  jing anŏ sat răm soh.

Nay Jek: Pơblang