VOV4.Jarai - Tom brơi lơ 24/11, ƀơi Hà Nội hăng Maxtcova hmâo pơphun Tal jơnum lăng nao rai mơng ataih tal 6 mơng Grŭp hyu mă bruă gah mơnuih mă bruă Việt Nam hăng Nga. Bruă jơnum yua kơ ơi Nguyễn Văn Hồi – Kơ-iăng Khua Ding jum wai lăng mơnuih mă bruă, tơhan rơka ruă hăng mơnuih mơnam dêh čar Việt Nam hăng Thiếu tướng Dimitriy Pavlovich Demidenko – Ding jum wai lăng tơlơi rơnuk rơnua, dêh čar Nga gum hrom git gai, hăng tơlơi gum hrom nao pơhmư̆ mơng khua pơ ala hơdôm Ding jum, gơnong bruă bơdjơ̆ nao mơng dua bơnah. Amăng mông jơnum, dua bơnah hmâo pơsit yôm hơdră jơnum rim tal hăng pơplih nao rai Grŭp hyu mă bruă, hrom hăng anun pơsit bruă djă pioh bôh tơhnal hơdră pơkă anai hmâo pơjing rai sa glông bruă gum hrom, bơkơtuai nao rai tơlơi pơhing ba glăi bôh tơhnal hăng hmao tlôn kơplah wah dua ƀirô ƀơi anăp wai lăng mơnuih mă bruă ƀơi dua bôh dêh čar ăt kah hăng hơdôm bôh ƀirô hmâo bơdjơ̆ nao wai lăng mơnuih mă bruă đuăi hyu dô̆. Mơng anun, gum hrom ĕp jơlan pơsir, pơtrut gum hrom mơnuih mă bruă hăng gum hrom pơtlaih hơdôm anô̆ tơnap phrâo hmâo lom gum hrom. Dua bơnah ăt lăi nao mơn tơlơi hră čih Tơlơi pơkôl ngă pơhư̆č hăng ruah mơnuih hmâo khul mơnuih Việt Nam nao mă bruă hmâo hrơi blan pơkă amăng lŏn ia Nga./.

Siu H’ Prăk: Pô pơblang