VOV4.Jarai-Kơ-iăng Khua ding jum tuh tia pơkra ming hăng sĭ mơdrô ơi Đặng Hoàng An hơmâo bơkơtuai hăng Kơ-iăng Khua ding jum sĭ mơdrô dêh čar Czech, Martina Tauberova kơ bruă kơtưn ngă hrom bơwih ƀong huă, sĭ mơdrô hăng tuh tia pơkra ming kơplah wah Việt Nam hăng dêh čar Czech laih anun bơblih nao rai boh yôm phun, akŏ bruă prăp lui tal rai čuă Việt Nam mơ̆ng Khua dêh čar Czech, ơi Andrej Babis.

Ƀơi mông kơtuai, Kơ-iăng Khua ding jum ơi Đặng Hoàng An lăi pơthâo amăng rơbêh sa thun rơgao, hơmâo tơlơi pơsit khut khăt mơ̆ng Ping gah, kơnuk kơna laih anun tơlơi tŭ ư sa pran jua mơ̆ng ană plơi, Việt Nam ngă tui truh kih hơdră pơtrun mơdua bruă, pơgang klin rah pơtrut tơlơi bơwih ƀong huă mơnuih mơnam rah.

Kơ-iăng khua ding jum čang rơmang pơtrut bruă ngă hrom sĭ mơdrô hăng tuh pơ alin dua bơnah. Rơkâo kơ anom bruă ding jum tuh tia hăng sĭ mơdrô dua bơnah ngă hrom tong ten, prăp lui tal rai čuă Việt Nam mơ̆ng Khua dêh čar Czech, ơi Babis. Ñu đăo kơnang tal rai čuă anai kiăng pơtrut tơlơi ngă giăng mah gru grua dua boh dêh čar đĭ amăng rơnuk phrâo.

Nay Jek: Pơblang