VOV4.Jarai-Khua gum bruă git gai ping gah dêh čar, ơi Võ Văn Thưởng phrâo kĭ hră pơčrâo trun mrô 05-CT/TW mơ̆ng Khua mua apăn bruă git gai ping gah dêh čar kơ bruă “Kơtưn tơlơi git gai mơ̆ng ping gah amăng bruă pơhrŏ ƀun rin hơđong kjăp truh thun 2030”.

Kiăng dưi ngă tŭ yua tơhnal pơkă mrô ƀun rin lu bơnah, djă hnong mơ̆ng 1-1,5% sa thun tui Hră pơtrun Jơnum ruah khua ping gah tal XIII; truh thun 2030, kiăng ƀu hơmâo tơring glông ƀun rin, să tơnap tap hloh dơ̆ng tah, Khua mua apăn bruă git gai ping gah dêh čar, pơtrun hiăp djop sang bruă ping gah, gong gai kơnuk kơna, anom bruă djop djuai ania mơnuih mơnam Việt Nam hăng djop khul grup mơnuih tơpuôl pơtum ngă tui tơlơi git gai pơhrŏ ƀun rin hơđong kjăp.

Bruă ngă pơhrŏ ƀun rin hơđong kjăp lĕ bruă ngă yôm biă mă amăng hơdră, akŏ bruă pơđĭ kyar bơwih ƀong huă mơnuih mơnam rĭm thun, Akŏ bruă pơđĭ kyar bơwih ƀong huă mơnuih mơnam 5 thun mơ̆ng 2021-2025 hăng bruă pơđĭ kyar 10 thun mơ̆ng thun 2021-2030 mơ̆ng djop gưl anom bruă gong gai kơnuk kơna.

Nay Jek: Pơblang