VOV4.Jarai - Ră anai, mơnuih pla phun sầu riêng ƀơi tơring glông Krông Pač, tơring čar Daklak glăk amăng bơyan pĕ pơhrui laih. Boh Sầu riêng pĕ pơhrui hơmâo hmăi samơ̆ nua trun kơtang, ngă kơ mơnuih pla phun sầu riêng hning rơngŏt biă mă.

Ơi Tạ Văn Châm, kơ-iăng Khua Jơnum min mơnuih ƀon sangíă Ea Yông brơi thâo: Đơ đam să hơmâo 2.000 ektar đang pla sầu riêng, amăng anun hơmâo 1 rơbâo ektar glăk amăng thun pĕ pơhrui. Boh sầu riêng pĕ pơhrui amăng bơyan anai him lăng rơbêh 20 rơbâo tơ̆n, lu giăm ha mơkrah mrô sầu riêng amăng đơ đam tơring glông. Hlâo anun đa thun sầu riêng Dona đĭ truh pơ 80 rơbâo prăk amăng sa kĭ, thun hlâo mơng 40-45 rơbâo prăk. Thun anai mơng akŏ bơyan pĕ pơhrui, boh sầu riêng J6 ăt sĭ nua rơbêh 30 rơbâo prăk. Ră anai boh sầu riêng Dona tơsă abih laih samơ̆ ƀing blơi boh sầu riêng aka ƀu gưt nao blơi. Đa sa, dua đang hmua pla boh sầu riêng hơmâo pơkă hlâo sĭ nua rơbêh 40 rơbâo prăk, samơ̆ ră anai khŏm hrŏ trun dŏ 25 rơbâo prăk, đa hrŏ trun kơtang dong kah mơng dưi ba hyu sĭ mơdrô.

“Ră anai boh sầu glăk amăng bơyan pĕ pơhrui laih samơ̆ yua klin Covid-19 ngă tơnap yua anun bruă sĭ mơdrô boh sầu riêng mơng neh met wa amăng să Ea Yông bưp tơnap tap biă mă yua ƀu dưi ba sĭ gơnam pơ tač rơngiao. Ƀing sĭ mơdrô ƀu gưt nao blơi, ƀudah blơi ƀiă đôč. Nua sĭ ră anai mơng 18-25 rơbâo prăk, tui hluai boh sầu riêng hiam hă ƀŭ”.

Mơnuih pla boh sầu riêng ƀơi Krông Pač glăk amăng bơyan pơhrui

Tui hăng jŭ yap mơng ơi Y Ngắc Niê, Khua grup mơnuih ngă hmua să Ea Yông amăng bơyan anai, mơnuih ngă hmua amăng să rơngiă rơbêh 400 klai prăk, yua nua sĭ boh sầu riêng Dona dŏ kơnong ha mơkrah pơhmu hăng thun hlâo.

“Boh sầu riêng kơ neh met wa ră anai truh hrơi boh tơsă hăng jruh, samơ̆ nua sĭ hrŏ trun na nao. Truh ră anai nua sĭ mơng 20-25 rơbâo prăk amăng sa kĭ”.

Ƀing gơmơi nao pơ hmua ơi Y Suông Niê ƀơi ƀuôn Jung. Ƀơi anai rơbêh 10 čô mơnuih glăk pĕ pơhrui boh sầu riêng, pơdŭ đĭ hăng rơdêh kiăng pơgiăng nao pơ anih sĭ mơdrô. Ơi Y Suông brơi thâo sang anŏ ñu sĭ laih 7 tơ̆n, kơnong amăng hrơi anai pĕ pơhrui laih 2 tơ̆n. Nua boh sầu riêng ƀơi hmua pơčlah jing 3 mơta, aset hloh lĕ 18 rơbâo, 22 rơbâo hăng 25 rơbâo prăk.

Lu sang măi tuh pơ alin măi mok pơkra pơjing, kơthung dưm gơnam rơ-ơ̆ hlâo kơ ba sĭ mơdrô

Ƀing gơmơi nao pơ Kông ti pơčruih ngăn sĭ mơdrô gơnam pơ tač rơngiao Dũng Thái Sơn ƀơi ƀut plơi 4, să Ea Kênh. Anai lĕ kông ti blơi pơhrui boh sầu riêng prong hloh amăng tơring glông Krông Pač. Ơi Lê Viết Chiến kơ-iăng khua kông ti brơi thâo: Yua kơ giăm anai kông ti tuh pơ alin kiăng kơ man pơdong dong sang rơ-ơ̆ pioh dưm gơnam yua anun rĭ hrơi dưi pơkra pơjing rơbêh 20 tơ̆n gơnam. Kông ti glăk gir run blơi pơhrui gơnam mơng đang hmua. Samơ̆ yua klin Covid-19, bruă pơdŭ pơgiăng hyu gơnam, sĭ pơ tač rơngiao bưp tơnap tap. Ơi Chiến brơi thâo ră anai kông ti aka ƀu dưi ba sĭ gơnam tam pơ tač rơngiao kar hăng rĭm thun, gơnam ră anai kơnong pơgiăng nao sĭ pơ ƀôn prong Hồ Chí Minh hăng hơdôm tơring čar kual Yŭ Dơnung đôč, yua anun mrô gơnam hơmâo arăng blơi ăt aset mơn, kơnong giăm 7.500 tơ̆n, ha mơkrah pơhmu hăng thun hlâo.

“Him lăng kông ti pơsit amra blơi pơhrui pioh pơkra pơjing 15.000 tơ̆n. Samơ̆ yua klin ngă tơnap tap, bruă blơi gơnam kaih, pơgiăng hyu ăt tơnap mơn, laih dong bruă jao prăk kak ăt kaih dong. Yua anun him lăng rơnoh pơhrui giăm 50% pơhmu hăng mrô pơkă hlâo anun”./.

Siu Đoan: Pơblang