VOV4.Jarai - Hrŏm hăng đơ đam dêh čar ta, hrơi tom brơi, mơnuih ƀon sang hơdôm tơring čar ƀơi kual Dap kơdư hơmâo pơphun hrơi plĕ hră ruah khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026. Anai lĕ hrơi jơnum tum pơƀut abih bang mơnuih ƀon sang, pơdah tơlơi dưi mơng rĭm čô mơnuih ƀon sang amăng bruă ruah khua mua thâo rơgơi, pơ ala brơi tơlơi kiăng, čang rơmang mơng mơnuih ƀon sang.

Ƀơi tơring čar Gialai, mơng mơguah lơ 23/5, tơdơi kơ mông ngă lơphet yôm phăn, pơphun tañ, mơnuih ƀon sang ƀơi 1.437 anih pơphun plĕ hră ƀơi 220 boh să, gah 17 tơring glông, plơi prong nao plĕ hră. Tơdơi kơ ngă tui tơlơi dưi plĕ hră mơng ƀing gơñu, amai Kay, dŏ ƀơi să Đăk Ta Ley, tơring glông Mang Yang, tơring čar Gialai brơi thâo:

Hrơi plĕ hră ruah khua pơ ala mơnuih ƀon sang dêh čar hăng khua khul pơ ala mơnuih ƀon sang djop gưl, amăng pran jua kâo hok mơ-ak biă mă yua kơ amra djă ƀơi tơngan hră ruah khua mua. Kâo čang rơmang amra ruah djơ̆ mơnuih rơgơi kơhnâo, hơdip ba gru, djru pơđĭ kyar bơwih ƀong huă brơi kơ mơnuih ƀon sang, biă mă ñu lĕ đing nao tơlơi hơdip kơ ƀing hlăk ai, pơtô hrăm, ĕp brơi bruă mă hăng djru hlăk ai pơphun bruă mă.

Ling tơhan wai pơgang guai tơring čar Daklak pơgiong bruă plĕ hră

Anai lĕ să hơmâo 78% mơnuih lĕ djuai ania K’ho, hrơi mông plĕ hră ƀơi Dă Nhim, tơring glông Lạc Dương, tơring čar Lâm Đồng pơphun yôm phăn, pơdah pran ngă pô. Ơi Cil Yŭ Ha Giảng, 63 thun, dŏ ƀơi plơi Liêng Bông, să Dă Nhim brơi thâo tal plĕ hră anai yôm biă mă hăng plơi pla, yua ñu đăo gơnang ƀing mơnuih tơbiă anăn ruah đĭ ngă khua pơ ala mơnuih ƀon sang dêh čar hăng Khua khul pơ ala mơnuih ƀon sang djop gưl amra pơ ala brơi tơlơi čang rơmang mơng mơnuih ƀon sang. Ƀing gơñu amra pơgôp pơjing hơdră bruă lăp djơ̆, amăng anun hơmâo pơhlôm brơi tơlơi hơdip mơnuih mơnam, pơklaih mơng ƀun rin hăng pơjing tơlơi hơdip bơwih ƀong huă hơđong brơi mơnuih ƀon sang.

Neh met wa hok mơ-ak kiăng kơ nao ruah khua mua pơ ala mơnuih ƀon sang hăng khua khul pơ ala mơnuih ƀon sang djop gưl. Hăng neh met wa, bruă ruah mơnuih thâo rơgơi, hơdip ba gru kiăng kơ git gai lŏn ia. Ƀing gơmơi đăo gơnang, čang rơmang tal ruah khua anai amra ba glăi tơlơi hiam klă.

Mơguah lơ 23/5, hrơi jơnum tum pơƀut kơ abih bang mơnuih ƀon sang ƀơi 660 anih pơphun plĕ hră amăng tơring čar Kontum ăt amăng hrơi mông hur har mơnuih. Tơdơi pơ ala brơi rơbêh 1.100 čô mơnuih ƀon sang ƀơi plơi Kon Hra Chót, ƀơi anih plĕ hră mrô 6, phừong Thống Nhất, plơi prong Kontum lĕ mơnuih đĭ plĕ hră tal blung a, ơi A Huy hok mơ-ak brơi thâo:

Kâo lĕ tha plơi ƀơi ƀut plơi pla Kon Hra Chót. Plơi pla gơmơi hok mơ-ak nao plĕ hră ruah khua pơ ala mơnuih ƀon sang dêh čar hăng khua khul pơ ala mơnuih ƀon sang djop gưl rơgơi kơhnâo. Tơdơi hlơi thơ dưi ruah ngă khua mua ăt čang rơmang ngă hiưm pă đing nao tơlơi hơdip kơ ană plơi pla.

Mơnuih ƀon sang Kon Hra Chót, phường Thống Nhất, plơi prong Kontum nao plĕ hră

Hlâo anun, amăng lơ 22/5, hơmâo tơlơi tŭ ư mơng Jơnum min plĕ hră ruah khua, giăm 12 rơbâo čô mơnuih ƀon sang ƀơi kual Dap kơdư pơphun plĕ hră tañ ƀiă ƀơi 63 anih pơphun plĕ hră, amăng anun hơmâo ƀing apăn bruă, ling tơhan ƀơi puih tơhan wai pơgang guai lŏn ia, mơnuih ƀon sang 6 să giăm guai lŏn ia hăng kual ataih, asuek, kual tơnap tap. Hơmâo prap lui tong ten hăng pơphun gơgrong kjăp, mơnuih ƀon sang ƀơi kual Dap kơdư hơmâo pơphun hiam klă 100% mrô mơnuih nao plĕ hră. Ơi Cao Trung Hiếu, tơhan ƀơi puih tơhan wai pơgang guai Đăk Ruê, gah anom bruă tơhan wai pơgang guai lŏn ia Daklak brơi thâo anai lĕ tal blung a ñu nao plĕ hră.

Kâo hok mơ-ak hăng pơ-ư pơ-ang yua anai lĕ tal blung a kâo nao plĕ hră ruah khua pơ ala mơnuih ƀon sang dêh čar hăng khua khul pơ ala mơnuih ƀon sang djop gưl. Hlâo kơ mông nao plĕ hră kâo hơmâo pel ĕp ƀing tơbiă anăn hăng pơmĭn tong ten amra ruah hlơi. Kâo đăo gơnang hơmâo ruah đĭ mơnuih rơgơi kơhnâo hloh kiăng kơ pơ ala brơi ană plơi pla. Kâo čang rơmang ƀing khua mua tơdơi kơ ruah đĭ ảma pơgôp tơlơi rơgơi kơhnâo amăng bruă pơjing guai lŏn ia tơring čar Daklak lăi phara hăng lŏn ia ta hnun mơn jai hrơi hơđong kjăp.

Kơnong tơring čar Kontum, hrŏm hăng bruă ngă tui tơlơi dưi nao plĕ hră, tơhan pơgang guai lŏn ia ăt pơhlôm rơnuk rơnua hơđong, hrŏm hăng 3 boh să giăm guai lŏn ia lĕ Đăk Plô, Đăk Nhoong hăng Đăk Long pơphun tañ ƀiă hrơi plĕ hră. Kơnong amăng mơguah lơ 22/5, rơbêh kơ 10.000 čô mơnuih ƀon sang ƀơi 6 boh să tơnap tap hăng 6 pioh tơhan ƀơi dua tơring glông Đăk Glei, Ngọc Hồi, tơring čar Kontum hơmâo pơgiong bruă pơphun plĕ hră tañ ƀiă, hăng giăm 12 rơbâo čô mơnuih ƀon sang nao plĕ hră, dưm dưm giăm 100%. A No, nao plĕ hră ƀơi anih plĕ hră mrô 2, să Đăk Long, tơring glông Đăk Glei, tơring čar Kontum, brơi thâo:

Mơnuih ƀon sang hur har pran jua nao plĕ hră. Abih bang mơnuih lêng kơ nao soh. Yua kơ anai lĕ tơlơi dưi mơng rĭm čô mơnuih, kiăng kơ ruah đĭ ƀing mơnuih rơgơi kơhnâo pơ ala brơi tơlơi kiăng, čang rơmang mơng mơnuih ƀon sang.

Hrơi plĕ hră ruah khua pơ ala mơnuih ƀon sang tal XV hăng khua khul pơ ala mơnuih ƀon sang djop gưl rơ wang thun 2021-2026 pơphun amăng hrơi blan klin Covid-19 glăk tơnap tap, amuñ ngă klin lar hyu mơng kual giăm guai, yua anun ƀing linh tơhan lĕ ƀing mơnuih amra gơgrong dua bơnah, pơphun plĕ hră ruah, wai pơgang guai lŏn ia laih dong pơgang klin rah, kiăng kơ hrơi lĕ hră dưi pơphun hiam klă. Amăng hrơi yôm phăn kơ lŏn ia, djop anih amăng kual Dap kơdư hơmâo rơbêh 4 klăk 55 rơbâo čô mơnuih, giăm 54 djuai ania đơ đam dêh čar, nao plĕ hră ƀơi 5725 anih pơphun plĕ hră.

Siu Đoan: Pơblang