VOV4.Jarai-Ƀơi kual Dap Kơdư, klin kheng ăt ƀă hyu tơnap tap biă mă, boh nik ñu ƀơi tơring čar Dak Lak jing anih hơmâo mrô mơnuih ƀă truh rơbâo laih djơ̆ klin Covid 19, lu biă mă amăng plơi pla ala ƀôn mơnuih djuai ƀiă. Tơlơi gir run pơhlôm, pơgang klin kiăng hơmâo tơlơi gum hro tơkai tơngan, pran jua laih anun tơlơi thâo hluh djơ̆ lăp mơ̆ng rĭm čô  mơnuih ƀôn sang ta.

Ƀuôn Kmrơ̆ng Prong A, să Ea Tu, plơi prong Ƀuôn Ma Thuôt, tơring čar Dak Lak ră anai hơmâo 550 boh sang anŏ hăng 2.200 čô mơnuih, lu mơnuih ƀôn sang djuai ania Êđê. Tơlơi pơhing klin kheng ngă bơbeč truh tơlơi bơwih ƀong huă hăng hơdip mơda mơnuih ƀôn sang. Ƀing hlăk ai nao mă bruă apah pơ ataih, ngă kông ñơn pơ lu kông ty sang bruă, sang măi khom pơdơi abih yua klin ngă. Tha plơi ơi Y Yơh Kƀuôr dŏ pơ ƀôn Kmrơ̆ng Prong A ră ruai, dơ̆ng mơ̆ng hơmâo klin Covid 19 tal 4 hơđuh glăi ƀơi Dak Lak hăng hơdôm tơring čar ieo gah, tha plơi ơi Y Yơh Kƀuôr hăng khua grup lir hơbit amăng plơi pla nao tơl sang pơtô lăi ană lơi pla ngă tui djơ̆ tơlơi pơtrun pơhlôm, pơgang klin, brơi kơđiăng pơtă pơtăn mơnuih sang anŏ gơñu glăi mơ̆ng anih hơmâo klin khom pơhaih bruă ia jrao laih anun dŏ amăng sang anŏ anăm tơbiă hyu ôh. Lơ̆m klin hơđuh glăi kơtang, mơnuih ƀôn sang ngă djơ̆ tơlơi pơtrun mơ̆ng khua mua kơnuk kơna dŏ amăng sang ƀu tơbiă hyu ôh laih anun ngă tui djơ̆ tơlơi pơkă pơhlôm, pơgang klin.

“Hăng klin Covid 19 lĕ ƀing gơmơi tha plơi hăng khua ƀôn, djop khul grup mơnuih mut phung ngă hrom hyu pơtô lăi mơnuih ƀôn sang ngă tui djơ̆ tơlơi pơtrun pơgang klin. Djop mơnuih ƀôn sang lêng kơ hmư̆ hăng ngă tui djơ̆, mơ̆ng tha rơma truh čơđai muai ngă tui bruă pơgang klin soh'’.

Tha plơi ơi Y Yơh Kƀuôr nao pơ sang mơnuih ƀôn sang pơtô lăi pơgang klin Covid 19

Ngă tui gru grua thâo gum pơgôp, khăp pap nao rai mơ̆ng djuai ania Việt Nam, mơ̆ng hrơi tal blung hơmâo klin hơđuh rai, djuai ania Êđê să Čuôr Dăng, tơring glông Čư̆ Mgar, Dak Lak hơmâo djru nao rai hăng gong gai kơnuk kơna laih anun tơhan ngă bruă pơgang klin, kiăng găn rơgao mông tơnap tap klin kheng ngă. Mơnuih ƀôn sang pơƀut gơnam djru ƀong huă, añăm pơtam boh troh ba nao kơ mơnuih ƀôn sang amăng plơi dŏ pơčlah phara tui hră pơčrâo mrô 16 mơ̆ng Khua dêh čar. Ơi Y Ƀhêñ Ayun, juăt iâu ơi Nik, ƀôn Čuôr Dăng A, tơring glông Čư̆ Mgar, Dak Lak lăi:

"Kâo ƀuh mơak mơ̆n hơmâo lu mơnuih ƀôn sang amăng plơi hơmâo pran jua čơmah, djru nao rai kiăng găn rơgao tơlơi tơnap tap klin Covid 19 ngă, djru plơi pơkŏn anih dŏ pơčlah hĭ, kiăng ƀing gơñu hơđong tơlơi hơdip mơda. Ƀing gơmơi kơnong iâu pơthưr ha wơ̆t mơnuih ƀôn sang ngă tui mơtam. Čang rơmang hăng pran jua thâo pơdjru tui anun, gum pơgôp nao rai mơ̆gn djuai Êđê ăt ngă tui na nao amăng mông tơnap tap lơ̆m tơlơi hơdip mơda”.

Kiăng pơhlôm pơgang klin Covid 19 klă, ră anai, djop plơi pla ala ƀôn, mơnuih ƀôn sang thâo hluh ngă tui 5 mơta tơlơi pơgang klin juăt lăi 5K. Hơdôm hrơi hăng anai, nao pơ să kual ataih, să Adơ̆k, tơring glông Đak Đoa, Gia Lai, ƀu tơnap ôh hơduah ĕp, lăng ƀuh mơnuih ƀôn sang gôm ƀô̆ soh sit tơbiă pơ rơngiao. Amai Rmah Seo, plơi Biă Tih, să Adơ̆k, tơring glông Đak Đoa, Gia Lai lăi nao kơ pran jua thâo pơgang klin mơ̆ng mơnuih ƀôn sang amăng plơi.

“Ƀuh rơđah mơ̆ng hrơi hơmâo klin Covid 19 mơnuih ƀôn sang hŭi biă mă, kơnang kơ lu tơlơi pơhing pôr klin anai ƀă hyu hŭi rơhyưt biă mă anun yơh ană plơi jai kraih hŭi. Khă tui anun, hơmâo tơlơi djru ba mơ̆ng djop gưl anom bruă kơnuk kơna pơtô lăi, mơnuih ƀôn sang thâo hluh khom truă bơnal gôm ƀô̆ sit tơbiă gah rơngiao, ngă tui 5 mơta tơlơi pơtă mơ̆ng bruă ia jrao brơi pơgang klin. Tơdah ƀu hơmâo bruă ječ ôh, mơnuih ƀôn sang dŏ amăng sang đôč. Lu sang anŏ thâo blơi prăp gơnam yua djă pioh. Mơnuih ƀôn sang mơ̆ng kual hơmâo klin glăi pơ tơring čar khom nao dŏ pơčlah abih hrơi pơkă, glăi pơ sang ăt khom dŏ amăng sang hơdôm hrơi djơ̆ rơnoh hrơi pơkă mơ̆n, ƀing ơi ia jrao nao ĕp lăng re se kiăng thâo. Čang rơmang klin kheng tañ abih, kiăng mơnuih ƀôn sang mă bruă bơwih ƀong pơđĭ kyar, ăt čang rơmang kơnuk kơna hơmâo hơdră djru tum teč kơ mơnuih ƀôn sang bơbeč djơ̆ klin ngă”.

Klin kheng Covid 19 ƀă hyu tơnap tap biă mă ngă kơ tơlơi hơdip mơda mơnuih ƀôn sang bơbeč yua kơtang. Mah hnun, mơnuih ƀôn sang ngă tui djơ̆ 5 mơta tơlơi pơtă pơtăn 5K mơ̆ng Ding jum ia jrao kiăng hrom hăng Ping gah laih anun kơnuk kơna pơtrut đuăi klin kheng. Amai H’Lan dŏ pơ ƀôn Kala Dơng, să Quảng Khê, tơring glông Dak Glong, tơring čar Dak Nông lăi:

“Mơ̆ng hrơi klin hơđuh rai amăng să lăi pha, amăng dêh čar ta hnun mơ̆n. Bruă pơtô ngă tui hơdră pơhlôm, pơgang klin Covid 19 amăng plơi gơmơi, mơnuih ƀôn sang ngă tui klă biă mă. Mơnuih ƀôn sang pơhaih tơlơi pơhing bruă ia jrao djop. Sang anŏ hlơi hơmâo ană bă nao mă bruă pơ ataih glăi pơ tơring čar ăt brơi pơhaih tong ten, kiăng tơhan djop sang bruă theo laih anun khom dŏ pơčlah phara. Lơ̆m hơdôm tơring čar pơ kual dơnung adih tơnap tap kơƀah mơnong ƀong huă, amăng plơi pla dŏ tơnap tap mơ̆n samơ̆ mơnuih ƀôn sang pơčruh čô ƀiă kiăng mơ-it nao kơ mơnuih ƀôn sang pơ kual klin ngă kơtang'’.

Jing tơring glông jĕ hăng plơi prong Đà Lạt, anih klin Covid 19 ƀă kơtang amăng plơi pla, tơring glông Lạc Dương, Lâm Đồng kơtưn pơdong anih pơgăn jơlan, brơi dŏ mă bruă ƀơi ling tơkuh guai đah mơ̆ng pel ĕp klin huăi ƀă nao pơ anih rơnuk rơnua pơkŏn. Ƀơi anih pơgăn jơlan pơgang klin Covid 19 či jơlan prang 27B, črăn găn nao pơ phường 12, plơi prong Đà Lạt, rơbêh 30 čô mơnuih bơblih nao rai dŏ mă bruă hrơi hăng mlam, amăng anun lu mơnuih ƀôn sang djuai ƀiă djru hrom. Tui hăng ơi Kră Jăn Ha Khiêu, tơhan kông an djuai ania K’ho,  hrom hăng ƀing ding kơna pơkŏn dŏ mă bruă pơgăn jơlan anun pioh pơgang klin. Bruă mă tơnap tap biă mă, boh nik amăng hrơi adai hơjan hlim, samơ̆ yua kiăng pơgang tơlơi suaih pral kơ ană plơi pla, anun yơh djop mơnuih mă bruă abih pran jua kiăng puh pơđuăi klin hăng pran jua mă bruă glăm ba prong biă mă.

“Tui hăng tơlơi pơpha bruă mơ̆ng dlông gơmơi ngă hrom abih bang dŏ mă bruă pơgăn jơlan, pơgang klin, kiăng anăm hơmâo klin ƀă nao pơ anih huăi ƀă klin ƀơi tơring glông kiăng pơgang tơlơi suaih pral kơ mơnuih ƀôn sang. Bruă ngă mơ̆ng gơmơi khom pel ĕp abih bang rơdêh găn rơgao nao rai, brơi gơñu khom pơhaih bruă ia jrao djop, boh nik ñu khom ĕp lăng tong ten mơnuih mơ̆ng anih pơkŏn rai, či mut nao amăng plơi, kiăng pơgăn klin anăm brơi ƀă hyu, ană plơi pla đah mơ̆ng hơđong mă bruă pơđĭ kyar bơwih ƀong huă”.

Hăng bruă ngă khut khăt mơ̆ng gong gai kơnuk kơna, tơlơi tŭ ư hrom mơ̆ng mơnuih ƀôn sang, ƀing gơmơi čang rơmang hơmâo lu tơlơi klă amăng bruă pơhlôm, pơgang klin Covid 19. Hơdôm boh plơi pla amăng kual Dap Kơdư glăi hơmâo tơlơi rơnuk ngă sang rơnang ngă hmua.

Nay Jek: Pơblang