VOV4.Jarai-Hăng bruă prăp lui tong ten, anun yơh mah lu plơi pla  kual ataih tơnap tap jơlan glông nao rai, samơ̆ bruă ruah khua ƀơi kual Dap Kơdư ăt pơphun mơak hrơi jơnum prong. Tơl pơ anih dŏ pơčlah yua Covid 19 hai, anih arăng guang dar yua hơmâo mơnuih ƀă kman klin, mơnuih ƀôn sang plĕ hră ruah khua ăt dưi ngă djop tơlơi dưi hăng bruă ngă ruah khua mơ̆ng sa cô mơnuih ƀôn sang gơñu.

Mơnuih plĕ hră Nguyễn Ngọc Liên, dŏ pơ anih pơčlah yua Covid 19 phường Tân Thành, plơi prong Ƀuôn Ma Thuôt, Dak Lak lăi:

“Mah amăng anih dŏ pơčlah hai, samơ̆ gơmơi ăt mơak, dưi ngă djơ̆ tơlơi dưi hăng bruă ta khom ngă. Gơmơi hơmâo ĕp lăng tong ten pioh ruah pô hlơi ƀing pơ ala mơnuih ƀôn sang hơmâo pran jua klă, thâo rơgơi”.

 Yăp truh 11 mông yang hrơi dong lơ 23/5, bruă ruah khua ƀơi kual Dap Kơdư pơphun rơnuk rơnua, gêh găl. Lu tơring čar, plơi pla amăng kual Dap Kơdư hơmâo čih pioh anăn mrô mơnuih nao plĕ hră tum djop, kah hăng ƀơi Lâm Đồng, hơmâo 5/12 boh tơring glông plơi prong dưi ngă djop 80% mrô mơnuih nao plĕ hră ruah khua.

Tơring glông Cát Tiên, tơring glông ataih, hơmâo 90%. Ƀơi Dak Lak, tơring glông Čư̆ Kuin, abih bang ƀing hơmâo anăn plĕ hră ruah khua lêng kơ nao plĕ hră ruah khua soh.

Nay Jek: Pơblang