VOV4.Jarai-Ƀơi plơi prong Ƀuôn Ma Thuôt, anom brưa pơsur tơlơi ngă hmua-pơjeh phun pla, djuai hlô mơnong rông hăng akan hơdang tơring čar Dak Lak ngă hrom anom bruă pơsur tơlơi ngă hmua dêh čar pơphun jơnum pơƀut bruă mă kơčăo bruă anăn “Pơkra hơdră hăng pơđĭ kyar hơdră pla boh troh plah wah amăng đang kơphê kual Dap Kơdư” mơ̆ng thun 2019-2021, ngă tui ƀơi 4 boh tơring čar, kah hăng Dak Lak, Dak Nông, Gia Lai hăng Lâm Đồng, amăng 3 thun rơgao mơ̆ng thun 2019-2021, kơčăo bruă anai hơmâo lông ngă lăng ƀơi 55 hektar hmua pla plah amăng đang kơphê hăng boh troh.

Kơnong ƀơi Dak Lak, amăng 3 thun  rơgao, mơ̆ng thun 2019-2021, hơmâo pla 55 hektar plah wah amăng đang kơphê ƀơi tơring glông Čư̆ Mgar, Krông Ƀŭk, Krông Năng, Ea Hleo hăng plơi prong Ƀuôn Hô, hơmâo 55 boh sang anŏ ngă hrom hơmâo 70% pơjeh hăng kmơ̆k pruai ia jrao hlăt, pơtô brơi hơdră mă yua lăp djơ̆ hăng ngă tui. Him lăng, lơ̆m phun boh troh truh thun pĕ boh, đĭ tui 20% pơkă hăng pla hơjăn kơphê, pơgăng anŏ bơbeč sat sit rơnoh boh troh gơnam đang hmua trun nua kah hăng ră anai.

Nay Jek: Pơblang