VOV4.Jarai - Hrơi tơjuh anai, lơ 23/5, mơnuih ƀon sang amăng dêh čar ta amra nao plĕ hră ruah pô pơ ala mơnuih ƀon sang dêh čar tal 15 hăng pô pơ ala mơnuih ƀon sang djŏp gưl rơwang thun 2021-2026. Ƀơi kual Dap Kơdư, rơwang hrơi tơjuh rơgao, ƀing hơmâo anăn ba ruah bưp laih mơnuih ƀon sang hăng jak iâu mơnuih ƀon sang plĕ hră kơ ƀing gơñu djơ̆ hăng tơlơi pơtrun. Ăt amăng rơwang thun rơgao mơn, Grup wai lăng, plel ĕp ruah khua mơng Jơnum min khua apăn bruă pơ ala mơnuih ƀon sang dêh čar, Anom bruă wai lăng bruă ruah khua dêh čar ya Kơ-iăng khua mir sir yă Võ Thị Ánh Xuân ngă khua ba jơlan hơmâo nao lăng bruă prăp lui mông plĕ hră amăng kual.

Rơwang hrơi tơjuh rơgao, ƀing hơmâo anăn ba ruah pơ ala mơnuih ƀon sang dêh čar tal 15 hăng pơ ala mơnuih bon sang djŏp tơring čar ƀơi kual Dap kơdư pơphun bưp laih mơnuih ƀon sang hăng jak iâu arăng ruah gơñu. Bruă pơphun jơnum brơi 10 čô mơnuih tơbiă anăn ngă Khua pơ ala mơnuih ƀon sang dêh čar tal 15 hăng 85 čô khua pơ ala mơnuih ƀon sang tơring čar, rơwang thun 2021-2026 hơmâo ngă tui tơlơi dưi iâu pơthưr mơnuih ƀon sang tŭ ư plĕ hră kơ ƀing gơñu hơmâo Jơnum min wai lăng djŏp djuai ania mơnuih mơnam Việt Nam tơring čar Kon Tum ngă klă biă, djơ̆ hăng tơlơi pơtrun. Abih bang mơnuih ƀon sang lêng lăi, ƀing hơmâo anăn ruah ngă pô pơ ala mơnuih ƀon sang dêh čar hăng ngă pô pơ ala mơnuih ƀon sang tơring čar lêng pơhiăp mơ-ak, jê̆ giăm hăng ană plơi pla; Jơlan hơdră ngă bruă ber đôč, pơƀuh tơlơi gơgrong bruă mơng pô lơ̆m hơmâo ană plơi ruah ngă khua pơ ala mơnuih ƀon sang dêh čar hăng khua pơ ala mơnuih ƀon sang tơring čar.

Kơ-iăng khua mir sir yă Võ Thị Ánh Xuân pơhiăp git gai mông jơnum.

Mơnuih ƀon sang ăt bơni mơn kơ ƀing tơbiă anăn ruah khua yua gơñu hơmâo pran jua gir kơ bruă, rơgơi amăng bruă ñu ngă, hơmâo čih pơkra Hơdră ngă bruă djơ̆ hăng tơlơi kiăng, laih anun tơdah dưi ngă lĕ klă biă. Tơdơi kơ hmư̆ 5 čô mơnuih tơbiă anăn ruah ngă khua pơ ala mơnuih ƀon sang dêh čar tal 15 hăng 7 čô tơbiă anăn ruah ngă khua pơ ala mơnuih ƀon sang tơring čar lăi pơthâo Hơdră ngă bruă mơng gơñu, Huỳnh Ngọc Phong, mơnuih ƀon sang dŏ ƀơi thôn 1, să Tân Lập, tơring glông Kon Braih lăi:

“Kâo tlao hok biă, hơmâo lu tơlơi đăo gơnang kơƀing tơbiă anăn ruah ngă khua. Ƀing gơñu hơmâo lăi nao tơlơi gơmơi dŏ bơngơ̆t, tơlơi tơnap mơng tơring čar Kon Tum lăi hrŏm, tơring glông Kon Braih lăi hơjăn. Pơhmutu kah hăng Khua ding jum gru grua boh thâo Nguyễn Văn Hùng mơng ataih rai pơ anai hơduah ĕp, sem lăng tơlơi phara hơjăn pơ kual anai, hơdôm tơlơi tơnap tap, tơlơi gêh gal mơng tơring čar Kon Tum lăi hrŏm, tơring glông Kon Braih lăi hơjăn. Kâo lăng tui anun lĕ tơlơi thâo lăng ba. Pơ anăp anai, lơ 23/5, mơnuih ƀon sang gơmơi amra djă hră plĕ ruah khua, ƀing dưi ngă khua amra ngă tơlơi ñu ƀuăn, ngă tui hơdră bruă mơ̆ pô anun lăi pơthâo”.

Bơ ƀơi plơi prong Buôn Ma Thuột, Khul Hlăk ai tơring čar Dăk Lăk pơphun jơnum bưp mơnuih ƀon sang hlăk ai hăng bruă ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026 pioh kơ ƀing hlăk ai tơdăm dra hăng ƀing čơđai sang hră mơng hơdôm boh sang hră đại học, cao đẳng. Ƀơi mông bưp, hlăk ai hơmâo hơduah ĕp tơlơi phiăn ruah khua pơ ala mơnuih ƀon sang dêh čar hăng khua jơnum min pơ ala mơnuih ƀon sang djŏp gưl, Phiah phiăn dêh čar hăng hơdôm hră pơ-ar mơng djŏp gưl kơ bruă ruah khua; thâo krăn, pơkơdong glăi hăng tơlơi pơčut pơčao, ngă rung răng mông plĕ hră; hơmâo lăi pơthâo kơ bruă plĕ hră, hơdră pơsir tơdah ƀing nao plĕ hră duam hĭ amăng hrơi nao plĕ hră. Phan Văn Khải, hlăk ai ƀơi phường Thành Công, plơi prong Buôn Ma Thuột lăi tui anai:

“Jing sa čô mơnuih blung a nao plĕ hră, hmư̆ mông jơnum pioh kơ hlăk ai lĕ kâo thâo rơđah hloh tơlơi dưi nao plĕ hră hăng hơmâo ƀing khua lăi pơthâo glăi tơlơi aka ƀu thâo hluh. Mơng anun, kâo amra prăp lui hrơi mông djơ̆ hăng tơlơi pơtrun ruah khua. Kâo čang rơmang ƀing khua pơ ala mơnuih ƀon sang dêh čar hăng khua pơ ala mơnuih ƀon sang djŏp gưl amăng rơwang bruă pơ anăp amra pơtrut đĭ tơlơi rơgơi hăng hơmâo hơdră djru pơđĭ kyar bơwih ƀong huă - mơnuih mơnam”.

Jơnum bưp hlăk ai hăng mông ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl.

Dŏ ha wơ̆t hrơi tơjuh đôč yơh mơng truh hrơi plĕ hră, rơwang hrơi tơjuh rơgao, Grup wai lăng, pel ĕp bruă ruah khua mơng Jơnum min apăn bruă pơ ala mơnuih ƀon sang dêh čar, Anom bruă ruah khua dêh čar yua Kơ-iăng khua mir sir yă Võ Thị Ánh Xuân ngă khua grup hơmâo nao lăng laih bruă prăp lui kơ mông ruah khua ƀơi plơi prong Gia Nghĩa, ƀơi mông iâu pơthưr ruah khua, lu mơnuih ƀon sang lăi ƀing hơmâo anăn ba ruah klă, hơmâo tơlơi pơmin hiam, ba gru hlâo amăng bruă mă, ngă tui djơ̆ tơlơi phiăn, dưi ba ruah ngă khua pơ ala mơnuih ƀon sang dêh čar hăng khua pơ ala mơnuih ƀon sang djŏp gưl rơwang thun 2021-2026. Ră anai plơi prong Gia Nghĩa hơmâo akŏ pơdong 59 anih plĕ hră, hăng 8.560 čô mơnuih nao plĕ hră. Plơi prong hơmâo prăp lui bruă mă rơđah laih, pơhlôm hơđong kơjăp rơnuk rơnua, pơhlôm pơgang klin hlâo, amăng hăng tơdơi hrơi plĕ hră.

Mơng bruă hơduah tơña, wai lăng, Kơ-iăng khua mir sir yă Võ Thị Ánh Xuân bơni kơ hơdôm tơlơi gir run mơng plơi prong Gia Nghĩa yua ngă bruă hơdeč hmar, djơ̆ hăng tơlơi pơtrun kơ bruă prăp lui ruah khua. Laih dong kiăng plơi prong khŏm ngă klă bruă pơgang klin Covid-19 pơhlôm kơ ƀing nao plĕ hră hăng mơnuih ƀon sang, kiăng hrơi ruah khua jing hrơi jơnum ngui prong mơng abih bang mơnuih ƀon sang.

“Hơmâo dua mơta bruă, tal sa mơnuih tơbiă anăn ba ruah khŏm hyu pôr pơhing, jak iâu pơhlôm tơlơi dưi mơng pô ñu. Tal anai tơnap ƀiă yua hơmâo pơphun amăng hrơi mông glăk hơmâo klin Covid-19 yua anun ƀing ta khŏm gir djru brơi kiăng pơhlôm tơlơi dưi mơng pô tơbiă anăn ba ruah, pơphun hăng lu hơdră bruă, ƀu bưp ƀơi anăp lĕ ƀing ta bưp mơng ataih, lăng nao rai amăng internet, tivi...ngă hiư̆m pă kiăng ƀing tơbiă anăn ba ruah ngă klă hloh tơlơi dưi iâu pơthưr plĕ hră mơng ƀing gơñu. Tal dua lĕ mơnuih plĕ hră khŏm ngă tui tơlơi dưi mơng ƀing gơñu mơn, mơng anun thâo pơmin nao plĕ hră ƀu kiăng arăng pơđar, nao plĕ hră djơ̆ tơlơi pơtrun”.

VOV Tây Nguyên: Čih -Siu H’Mai: Pơblang