VOV4.Jarai - Ƀơi tơring glông giăm guai Tuy Đức, tơring čar Dak Nông, hơdôm hrơi laih rơgao hơmâo laih 1.200 čô mơnuih glăi mơng hơdôm tơring čar kual Dơnung. Gong gai ƀon lan hơmâo gum hrŏm hăng djop khul grup, mơnuih ƀon sang djru gah bruă ia jrao, gơnam ƀong huă kiăng ƀing gơñu hơđong pran jua pơčlah pơƀut pioh pơgang klin Covid-19.

Amăng anih pơčlah pơƀut ƀơi Sang hră čơđai anet Họa My ƀơi ƀut plơi 5, să Quảng Tâm, ayong Lương Văn Lý, lĕ mơnuih glăi mơng tơring čar Bình Dương brơi thâo:

“Kâo glăi lơ̆m lơ 3/10, tui tơlơi črâo ba amăng bruă ia jrao ƀơi ƀon lan kiăng nao pơčlah pơƀut amăng 14 hrơi. Mơng hrơi glăi pơ plơi pla kâo hơmâo test tañ klin Covid-19 lu wŏt, lêng kơ huăi ƀă klin soh. Anih pơčlah ăt agaih rơnăk mơn, mơñum ƀong djop 3 wŏt amăng sa hrơi, pơhlôm tơlơi suaih pral. Kâo hơđong amăng pran jua lơ̆m dŏ pơčlah ƀơi anai”.

Sa anih pơčlah pơƀut ƀơi să Quảng Tâm, tơring glông Tuy Đức, Dak Nông

Ơi Nguyễn Quốc Hải - Kơ-iăng Khua Jơnum min mơnuih ƀon sang să Quảng Tâm brơi thâo, să ră anai hơmâo rơbêh 60 čô mơnuih glăi mơng hơdôm tơring čar kual Dơnung glăk dŏ pơčlah pơƀut. Kiăng kơ djru brơi mơnuih ƀon sang hơđong pơčlah pioh pơgang klin, să iâu pơthưr djop khul grup, mơnuih ƀon sang djru prăk kak, gơnam ƀong huă, tơnă hơbai djru brơi hơdôm anih pơčlah pơƀut:

“Tui tơlơi pơkă mơng djop gưl amra duh 80 rơbâo prăk ƀong sa čô mơnuih amăng  sa hrơi, aka ƀu yap wŏt prăk ia mơñum, kah hăng hơdôm gơnam yua pơkŏn dong. Tui tơlơi pơkă lĕ tui anun samơ̆ ƀing gơmơi aka ƀu mă prăk hlơi ôh. Ră anai amăng să glăk iâu pơthưr ƀing mơnuih čơmah gum pơgôp, djru tơnă hơbai soh sel brơi neh met wa amăng anih pơčlah pơƀut. Neh met wa ƀơi anai tơnap tap biă mă, ƀing gơmơi gir run jak iâu dong yua kiăng kơ plai ƀiă tơnap tap gum hrŏm amăng bruă pơgang klin tal anai”.

Amăng hơdôm blan laih rơgao, tơring glông giăm guai Tuy Đức (Dak Nông) čơkă rơbêh 4.000 čô mơnuih glăi mơng hơdôm tơring čar kual dơnung. Kơnong mơng akŏ blan 10 truh ră anai hơmâo laih rơbêh 1.200 čô mơnuih glăi pơ plơi pla. Đơ đam tơring glông hơmâo 16 čô mơnuih ƀă klin Covid-19, lêng ƀuh amăng anih pơčlah pơƀut, ƀu hơmâo hlơi ôh ƀă yua kơ lar hyu amăng mơnuih mơnam.  

Sa čô mơnuih čơmah ƀơi să Quảng Tâm nao pơgôp prăk hăng gơnam ƀong huă brơi kơ anih pơčlah pơƀut

Ơi Trương Đức Minh - Khua anom bruă ia jrao tơring glông Tuy Đức brơi thâo, hlâo kơ hrơi mơnuih ƀon sang glăi mơng kual hơmâo klin lu tui, Jơnum min mơnuih ƀon sang tơring glông hơmâo pơdong 7 anih pơčlah pơƀut ƀơi djop să hăng sa anih amăng Anom bruă kơđi čar tơring glông. Bruă pơčlah pơƀut lĕ bruă klă hloh kiăng kơ pơgang hŭi klin lar hyu amăng plơi pla. Tui hăng tơlơi pơkă, mơnuih glăi pơčlah pơƀut amra duh 80.000 prăk ƀong rĭm hrơi. Samơ̆, tơring glông hơmâo jak iâu gum pơgôp kiăng kơ lui hĭ mă prăk mơng anun djru brơi mơnuih ƀon sang hơđong pran jua pơčlah pơƀut:

“Tui hơdră bruă, ƀing mơnuih gah sang anŏ ƀun rin huăi mă prăk ôh, bơ dŏ glăi ăt duh prăk mơn. Ƀơi tơring glông Tuy Đức ƀing gơmơi jak iâu gum pơgôp. Bruă ba mơnuih glăi pơčlah pơƀut ƀơi hơdôm să lĕ hơdră bruă klă hloh. Lơ̆m mơnuih ƀon sang glăi pơ hơdôm să pơčlah, ƀing gơñu ƀuh pran čơkă jê̆ giăm lơ̆m glăi pơ plơi pla, yua anun bruă pơtrut pơsur gum pơgôp hơmâo djru tơnă hơbai hăng djru brơi tŭ yua biă mă”.

Amăng hrơi blan klin Covid-19 ngă tơnap tap, gru grua hiam klă “Gum djru tơdruă, hlơi hơmâo djru brơi pô rin” mơng djuai ania Việt Nam hơmâo hăng glăk hơmâo mơnuih ƀon sang ƀơi tơring glông rin Tuy Đức ngă tui na nao. Pran gum pơgôp, thâo djru nao rai lĕ “vaccine” yôm hloh pioh pơgang klin Covid-19.

Siu Đoan: Pơblang